हिमाल दर्शन स्काउट ट्रुपद्वारा नेपाल स्काउटको ७४ औं स्थापना दिवस भव्य रूपमा सम्पन्न

असार ६, सोलुखुम्बु । सोलुुखुम्बुको नेचासल्यान गाउँपालिका–३ स्थित हिमाल दर्शन स्काउट ट्रुपले नेपाल स्काउटको ७४ औं स्थापना दिवस तथा ट्रुपको प्रथम स्थापना दिवस २०८२ को अवसरमा “स्काउट प्रतिभा प्रष्फुटन कार्यक्रम” आयोजना गरी विविध प्रस्तुति र प्रतिभा प्रदर्शनका साथ भव्य रुपमा कार्यक्रम सम्पन्न गरेको छ । कार्यक्रमको सभाध्यक्षता हिमाल दर्शन मा.वि. का प्रधानाध्यापक तथा स्काउट प्रमुख लाल प्रसाद वास्तोलाले गर्नुभएको थियो, भने प्रमुख अतिथिको रूपमा नेचासल्यान गाउँपालिका उपाध्यक्ष तथा स्थानीय स्काउट संयोजक विना राईको उपस्थिति रहेको सहकर्मी सोभित ढुंगेलले जानकारी दिनुभयो ।

त्यस्तै, विशिष्ट अतिथिको रूपमा स्थानीय स्काउट आयुक्त छविलाल वास्तोला तथा विद्यालय व्यवस्थापन समिति अध्यक्ष ओम प्रसाद वास्तोला, सदस्य नवराज जमरकट्टेल लगायतको पनि कार्यक्रममा उपस्थिति रहेको थियो । कार्यक्रममा बोल्दै प्रमुख अतिथि उपाध्यक्ष विना राईले स्काउट गतिविधिले विद्यार्थीहरूलाई अनुशासित, जिम्मेवार र नेतृत्वदायी बनाउने बताउँदै यस्ता कार्यक्रमले उनीहरूको प्रतिभा उजागर गर्न मद्दत गर्ने धारणा राख्नुभयो ।

कार्यक्रम अन्तर्गत स्काउटहरूद्वारा नृत्य, गीत, वक्तृत्वकला, नाट्य प्रदर्शन लगायतका विभिन्न विधामा आफ्ना प्रतिभा प्रस्तुत गरेका थिए। “स्काउट प्रतिभा प्रष्फुटन कार्यक्रम” मार्फत विद्यार्थीहरूमा लुकेका सिर्जनात्मक क्षमता उजागर गर्न सफल भएको सहभागीहरूद्वारा भनिएको छ । स्थानीय स्तरमै यस्ता प्रेरणादायी कार्यक्रम आयोजना हुनु समुदाय तथा विद्यालयका लागि गर्वको विषय भएको सहभागी अभिभावक तथा अतिथिहरूले बताएका थिए ।