ओखलढुंगाको पर्यटकीय क्षेत्रमा बजेट नपरेकोप्रति सांसद खतिवडाको आक्रोश

असार ६, सोलुखुम्बु । राज्य व्यवस्था तथा सुशासन समितिका सभापति तथा नेपाली कांग्रेसका सांसद रामहरि खतिवडाले ओखलढुंगाको प्रमुख पर्यटकीय क्षेत्रहरूमा बजेट विनियोजन नभएकोप्रति कडा आपत्ति जनाउनुभएको छ । आज प्रतिनिधिसभाको बैठकमा विनियोजन विधेयक, २०८२ अन्तर्गतको विभिन्न शीर्षकमाथि छलफल हुँदै गर्दा सांसद खतिवडाले संस्कृति, पर्यटन तथा नागरिक उड्डयन मन्त्रालयले ओखलढुंगाका पर्यटकीय तथा धार्मिक स्थलहरूलाई बेवास्ता गरेको आरोप लगाउनुभयो ।

उहाँले लिब्जु डाँडा (देवताथान), जलजले, चिसंखुगढी, जलजलेश्वर र अन्य ऐतिहासिक तथा धार्मिक स्थलहरूमा एक रुपैयाँ पनि बजेट विनियोजन नगरिएको भन्दै आक्रोश पोख्नु भएको हो । ‘बजेट ओल्टाइपल्टाइ हेरेँ, तर कहीँ देखिनँ’, उहाँले भन्नुभयो, ‘पहिले बजेट विनियोजन हुन्छ भन्ने गरिन्छ, तर बेला पर्दा नगर्ने हो भने त्यो केका लागि हो?’ उहाँले चण्डेश्वरी विमानस्थलको विस्तार तथा मर्मतसम्भारका लागि समेत बजेट नछुट्याइएकोप्रति गुनासो गर्नुभयो ।

‘पूर्वको प्रख्यात पर्यटकीय क्षेत्र ककनीमा त थोरै भए पनि बजेट प्रस्ताव भएको छ, तर लिब्जु, जलजलेश्वर, चिसंखुगढीजस्ता ठाउँमा बजेट नछुट्याउनु अन्याय हो’, खतिवडाले संसदमा बताउनुभयो । उहाँले मन्त्रालयले आफ्नो निर्वाचन क्षेत्रलाई नदेखेर बजेटको असमान वितरण गरेको गुनासो गर्दै भन्नुभयो, ‘यो कस्तो बजेट हो ? आफ्नो निर्वाचन क्षेत्रमै मात्रै बाँड्ने हो ?’ सांसद खतिवडाले पर्यटनमन्त्रीबाट ओखलढुंगाका पर्यटकीय क्षेत्रहरूको विकासमा चासो नदेखाएको आरोपसमेत लगाउनुभयो ।