लिम्चुङ्बुङको पञ्चकन्या आ.वि.मा ‘बुक फ्री डे’ प्रभावकारी बन्दै

असार ६, सोलुखुम्बु । उदयपुरको लिम्चुङ्बुङ गाउँपालिकाले विद्यालय शिक्षामा नविन अभ्यासका रूपमा सञ्चालन गर्दै आएको ‘बुक फ्री डे’ कार्यक्रम प्रभावकारी बन्दै गएको छ । प्रत्येक शुक्रबार किताब र पाठ्यपुस्तक बाहेकका सिर्जनात्मक र सीपमूलक गतिविधिमा केन्द्रित यो कार्यक्रमले बालबालिकाको व्यवहारिक ज्ञान र उद्यमशीलताको विकासमा टेवा पु¥याइरहेको छ ।

गाउँपालिका कार्यपालिका र शिक्षा शाखाको संयुक्त निर्णयअनुसार पञ्चकन्या आधारभूत विद्यालय कक्षा (०–८), मिनासिकामा शुक्रबारको दिन विविध सिर्जनात्मक कार्यक्रम सञ्चालन हुँदै आएका छन् । सरसफाइ अभियान, फलफूल रोपण, हाजिरीजवाफ, नृत्य प्रतियोगिता, वक्तृत्वकला, चित्रकला, बाल भित्ते पत्रिका लेखन तथा प्रकाशन, पातबाट टपरा र दुना बनाउनेजस्ता क्रियाकलापमा विद्यार्थीहरू सक्रिय सहभागी भइरहेका छन् । बालमैत्री स्थानीय शासन फोकल पर्सन मिलन परियारका अनुसार, यस अभियानले बालबालिकालाई सैद्धान्तिक शिक्षा बाहेक व्यवहारिक सीपमा समेत दक्ष बनाउँदैछ ।

विद्यालयका शिक्षक चन्द्र कुमार राईले बालबालिकालाई सीप र उद्यमसँग जोड्न विद्यार्थीहरूकै अगुवाइमा बाल क्लबमार्फत कार्यक्रम सञ्चालन भइरहेकाले उनीहरूको नेतृत्व क्षमतासमेत विकास भइरहेको जानकारी दिनुभयो । शिक्षा शाखा प्रमुख गोविन्द कार्कीका अनुसार, शिक्षा मात्र होइन, सीप र प्रविधिसँगको समायोजन मार्फत गाउँको भावी पुस्तालाई आत्मनिर्भर बनाउन कार्यक्रम अगाडि सारिएको हो ।

गाउँपालिका अध्यक्ष मेजर कुमार राईले पनि बालबालिकालाई केवल किताबमा सीमित नराखी व्यवहारिक ज्ञान, सीप र उद्यमसँग जोड्नुपर्ने आवश्यकता औँल्याउँदै, यही माध्यमबाट गाउँ र व्यक्तिको आर्थिक समृद्धि सुनिश्चित गर्न सकिने धारणा राख्नुभयो । स्थानीय तहको सक्रियता, विद्यालयको समर्पण र समुदायको साथले लिम्चुङ्बुङमा शिक्षा र उद्यमको नविन यात्रा अघि बढेको छ ।