असार ७, सोलुखुम्बु । सोलुखुम्बुको लिखुपिके गाउँपालिकामा अवस्थित पर्यटकीय गन्तव्य पिकेडाँडाको पूर्वाधार विकासका लागि ३ करोड रुपैयाँ बजेट विनियोजन गरिएको छ । संस्कृति, पर्यटन तथा नागरिक उड्डयन मन्त्रालयले पर्यटन प्रवद्र्धनका लागि सो रकम छुट्याएको हो । गाउँपालिकाको प्रस्ताव अनुसार पिकेपार्क, टेलिस्कोपसहितको भ्यूपोइन्ट हाउस निर्माण तथा पिके बेसक्याम्पसम्म साइक्लिङ लेन तयार गरिनेछ। उक्त योजना लागू गर्न मन्त्रालयलाई प्रस्ताव पठाइएकोमा सोही अनुरूप माग बमोजिमको बजेट स्वीकृत गरिएको पालिका अध्यक्ष मिना कार्की बस्नेतले जानकारी दिनुभयो ।
समुद्र सतहदेखि करिब ४,०६७ मिटरको उचाइमा रहेको पिकेडाँडा प्राकृतिक सुन्दरतासँगै सांस्कृतिक, धार्मिक तथा साहसिक पर्यटनको प्रचुर सम्भावना बोकेको क्षेत्र मानिन्छ । अध्यक्ष बस्नेतले पर्यटन पूर्वाधार विकासमा विशेष चासो र प्रतिबद्धता जनाउँदै बजेट स्वीकृत गरिदिएकोमा संस्कृति, पर्यटन तथा नागरिक उड्डयन मन्त्री बद्रीप्रसाद पाण्डेप्रति आभार प्रकट गर्नुभएको छ ।
साथै, बजेट सुनिश्चित गर्न विशेष पहल र समर्थन गरेका पूर्वमन्त्री बलबहादुर केसीप्रति समेत धन्यवाद व्यक्त गर्नुभएको छ । पर्यटन विकासमार्फत स्थानीय रोजगारी सिर्जना र आर्थिक समृद्धिमा टेवा पुग्ने विश्वास गाउँपालिकाले व्यक्त गरेको छ ।
Discussion about this post