लुक्लामा पहिलो व्याडमिन्टन कभर्ड हलको उद्घाटन

असार ७, सोलुखुम्बु । सोलुखुम्बुको खुम्बु पासाङल्हामु गाउँपालिका–२, लुक्लामा निर्माण गरिएको पहिलो व्याडमिन्टन कभर्ड हलको उद्घाटन गरिएको छ । शनिबार कोशी प्रदेशसभा सदस्य तथा पूर्वमन्त्री बुद्विकुमार राजभण्डारीले उक्त कभर्ड हलको उद्घाटन गर्नुभएको हो ।

पूर्वमन्त्री राजभण्डारीले स्वर्गीय गाउँपालिका अध्यक्ष ङिम दोर्जि शेर्पाको सपना साकार बनाएकोमा वर्तमान गाउँपालिका नेतृत्वलाई बधाई दिँदै कभर्ड हलले खुम्बु क्षेत्रको खेलकुद र पर्यटन विकासमा योगदान पु¥याउने विश्वास व्यक्त गर्नुभयो । गाउँपालिका अध्यक्ष मिङमा छिरी शेर्पाले प्रदेश र गाउँपालिकाको संयुक्त लगानीमा निर्मित २ कोर्टको हललाई भविष्यमा उच्च हिमाली खेलकुद केन्द्रका रूपमा विकास गर्ने योजना रहेको बताउनुभयो ।

कुल लागत १ करोड ७८ लाख ४५ हजार रुपैयाँ रहेको कभर्ड हल निर्माणमा तीन आर्थिक वर्षमा बजेट विनियोजन गरिएको थियो । वडा अध्यक्ष आङ फूर्वा शेर्पाका अनुसार हल निर्माणमा सामग्रीको ढुवानी चुनौतीपूर्ण भए पनि सुविधासम्पन्न कभर्ड हलले युवालाई आकर्षण गर्ने विश्वास गरिएको छ । कभर्ड हल हिमालयन क्लबलाई सञ्चालनका लागि हस्तान्तरण गरिएको छ ।