कोशी प्रदेशमा मनसुनजन्य विपत्तिको जोखिम :पूर्वतयारीमा मुख्यमन्त्री कार्कीको जोड

असार ७, सोलुखुम्बु । कोशी प्रदेशका मुख्यमन्त्री हिक्मतकुमार कार्कीले मानवीय लापरबाहीका कारण मनसुनजन्य विपत्तिको जोखिम दिनप्रतिदिन बढिरहेको बताउनुभएको छ । शुक्रबार विराटनगरमा आयोजित मनसुन पूर्वतयारी तथा प्रतिकार्य योजनाु सम्बन्धी संवाद कार्यक्रममा सम्बोधन गर्दै उहाँले भौतिक पूर्वाधार निर्माणमा वातावरणीय मूल्याङ्कन नगर्दा विपत्तिको रूप लिने गरेको चिन्ता व्यक्त गर्नुभयो ।

मुख्यमन्त्री कार्कीले प्रदेशका सबै जिल्लामा प्रभावकारी विपद् व्यवस्थापनका लागि तयारी गर्न आन्तरिक मामिला तथा कानुन मन्त्रालयलाई निर्देशनसमेत दिए। साथै, मानवीय, भौतिक तथा आर्थिक क्षति न्यूनीकरणका लागि जनचेतना अभिवृद्धिमा विशेष ध्यान दिनुपर्नेमा जोड दिनुभएको छ । कार्यक्रममा आन्तरिक मामिला तथा कानुन मन्त्री रेवतीरमण भण्डारीले कोशी प्रदेशले पाँचवर्षीय विपद् व्यवस्थापन रणनीति कार्ययोजना अनुसार जोखिम विश्लेषण र संवेदनशील बस्तीको पहिचान गर्दै आएको जानकारी गराउनुभयो ।

अति जोखिममा रहेका बस्तीहरूको स्थानान्तरणको तयारी भइरहेको र संघीय, प्रदेश तथा स्थानीय सरकारबीच समन्वय गर्दै विपद् प्रतिकार्यलाई प्रभावकारी बनाउने योजना रहेको उहाँले बताउनुभयो । संवाद कार्यक्रममा विभिन्न विज्ञहरूले विषयगत कार्यपत्रहरू प्रस्तुत गर्नुभएको थियो । कार्यक्रमले प्रदेशस्तरमा मनसुनजन्य विपद् न्यूनीकरण र प्रतिकार्यका लागि साझा दृष्टिकोण विकास गर्न सहयोग पुग्ने अपेक्षा गरिएको छ।