माप्य १ ले गर्याे सार्वजनिक सुनुवाइ सम्पन्न, यस्ता काम भए सम्पन्न

असार १०, साेलुखुम्बु ।  सोलुखुम्बुको माप्य दुधकोशी गाउँपालिका वडा नम्बर १ का् सार्वजनिक सुनुवाइ सम्पन्न भएको छ । रेडियो एभरेष्टको सहजिकरण तथा माप्य दुधकोशी गाउँपालिका वडा नम्बर १ को आयोजनामा सम्पन्न भएको सार्वजनिक सुनुवाई आइतबार वडा कार्यालयको भवनमा सम्पन्न भएका हो ।

सम्पन्न सार्वजनिक सुनुवाइमा वडा अध्यक्ष सज्जन राईको सभापतित्व रहेको थियो भने वडाका सदस्यहरू, लगायत कर्मचारीहरू, शिक्षकहरु, अगुवा कृषकहरु, बुद्धिजिवी वर्ग तथा समाजसेवीहरुको उपस्थिति रहेको थियो । सार्वजनिक सुनुवाईमा वडा अध्यक्ष सज्जन राईले चालु आर्थिक वर्षमा वडाले सञ्चालन गरेका योजना तथा कार्यक्रमहरूको जानकारी गराउनु भएको थियो । वडाका सचिव कार्यक्रममा नभएका कारण सम्पूर्ण विवरण वडा अध्यक्ष राईले नै पेश गर्नु भएकाे थियो ।

सार्वजनिक सुनुवाई कार्यक्रममा जुभि स्वास्थ्य चौकीका इन्चार्ज विजय राईले त्यहाँको स्वास्थ्य सेवा प्रवाहको बारेमा जानकारी दिनुभएको थियो ।

यस्तै, सहभागिको सवाललाई कार्यपालिका सदस्य आङकाजी शेर्पाले सम्बोधन गर्नुभयो । उहाँले अन्य विकासका माग मात्र नभई कृषिमा जोड गर्न आग्रह गर्नु भयो ।
सार्वजनिक सुनुवाइका क्रममा कार्यक्रमका सभापति एवं वडा अध्यक्ष सज्जन राईकोले वडामा आएको बजेटलाई समुचित ढङ्गले बाँडफाँड गरि नागरिकलाई सेवा दिइएको बताउनुभएको थियो । आफूले सकेको पहल कदमी गरेको र वडाबासीको काम अनुसार सदरमुकाम नै स्वयम पुगी सहयोग गरेको उहाँकाे भनाई थियो ।

उहाँले ग्रामीण भेगका वडाहरूमा विभिन्न समस्या रहेको उल्लेख गर्दै उक्त समस्याहरू समाधानका लागि वडाको बजेटले नभ्याउने र राज्यले सानो रकम वडामा पठाइँदिदा सबै मागहरू सम्बोधन गर्न नसकिएको गुनासो व्यक्त गर्नुभयो ।

सहभागीहरुको प्रश्न, गुनासो तथा सुझाव सबैको वडा अध्यक्षले सम्बोधन गर्नुभएको थियो । त्यसलगत्तै योजना तर्जुमाका लागि सोही सहभागिहरुले छलफल गर्नुभएको थियो ।