सोलुखुम्बुमा लागू औषध विरुद्धको अन्तराष्ट्रिय दिवस तथा ट्राफिक सप्ताह कार्यक्रम सम्पन्न

असार १२, सोलुखुम्बु । हिमाली जिल्ला सोलुखुम्बुमा लागू औषध दुरुपयोग तथा अवैध ओसारपसार विरुद्धको अन्तराष्ट्रिय दिवस र ट्राफिक सप्ताह २०८२ भव्य रूपमा सम्पन्न भएको छ । जिल्ला प्रहरी कार्यालय सोलुखुम्बु र जिल्ला ट्राफिक प्रहरी कार्यालयको संयुक्त आयोजनामा एक सातासम्म विविध कार्यक्रम सञ्चालन गरी कार्यक्रम सम्पन्न गरिएको हो ।

असार ६ गतेदेखि सुरु भएको उक्त सप्ताहको अन्तिम दिन, जिल्ला प्रहरी कार्यालय सोलुखुम्बुको सभाहलमा समापन कार्यक्रमको आयोजना गरिएको थियो । जिल्ला ट्राफिक प्रहरी कार्यालय सोलुखुम्बुका ईन्चार्ज प्रहरी नायव निरीक्षक कृष्ण कट्वालका अनुसार एक सातासम्म सञ्चालन भएको अभियानमा सचेतनामूलक अन्तरक्रिया कार्यक्रम, ट्राफिक नियम सम्बन्धी जानकारीमूलक सामग्री वितरण, पम्पलेट तथा पोस्टर टाँस, जनचेतना कार्यक्रम लगायतका विविध गतिविधि समावेश गरिएका थिए ।

युवाहरूमाझ लागू औषध दुरुपयोगको बढ्दो प्रवृत्तिबाट जोगिन तथा ट्राफिक नियम पालनाको आवश्यकताबारे जनचेतना फैलाउनु कार्यक्रमको उद्देश्य रहेको आयोजक पक्षले जनाएको छ ।समापन कार्यक्रममा सोलुदुधकुण्ड नगरपालिकाकी उप–प्रमुख गान्धी माया तामाङ, प्रमुख जिल्ला अधिकारी अनोज कुमार घिमिरे, प्रहरी नायव उपरीक्षक मनोजित कुँवर अन्य सुरक्षा निकायका प्रमुखहरू, स्थानीय जनप्रतिनिधि, विभिन्न संघसंस्थाका प्रतिनिधि, सञ्चारकर्मी, सवारी चालक तथा सवारीधनी, यातायात व्यवसायी, व्यापारी लगायत स्थानीय बासिन्दाहरूको उल्लेख्य सहभागिता रहेको थियो ।