थुलुङ दूधकोशी गाउँपालिकाको सूचनाः जोखिमयुक्त सडकमा सवारी नगर्न आग्रह

असार १२, सोलुखुम्बु । सोलुखुम्बुको थुलुङ दूधकोशी गाउँपालिकाले बर्खाको समयमा बढ्दो जोखिमलाई मध्यनजर गर्दै केही सडक खण्डहरूमा सवारी आवागमन रोक्न अनुरोध गरेको छ । बुधबार सार्वजनिक सूचना जारी गर्दै गाउँपालिकाले सर्वसाधारणलाई वैकल्पिक मार्ग प्रयोग गर्न आग्रह गरेको हो ।

निरन्तर वर्षा र असहज मौसमका कारण स्थानीय सडकहरूमा सवारीसाधनको आवतजावत जोखिमपूर्ण बन्दै गएको गाउँपालिकाका प्रमुख प्रशासकीय अधिकृत प्रशन्दीप राईद्वारा हस्ताक्षरित सूचनामा उल्लेख गरिएको छ । विशेष गरी सल्लेरी हुदैँ चारघरेसम्म पुग्ने मुख्य सडक खण्ड स्तरउन्नतिको काम भइरहेकाले त्यहाँ यात्रुहरूको सुरक्षामा समस्या देखिएको जनाइएको छ ।

सूचनाअनुसार, बक्सेपुर–चारघरे–६ नं वडा कार्यालय चोक सडक खण्डमा पूर्णरूपमा सवारी प्रयोग नगर्न अनुरोध गरिएको छ। त्यस्तै, बक्सेपुर–लेखखर्क–मैदेल–६ नं वडा कार्यालय चोक सडक खण्डमा भने अत्यधिक सावधानीपूर्वक मात्र सवारी सञ्चालन गर्न भनिएको छ । गाउँपालिकाले यो निर्णय सवारी दुर्घटनाको जोखिम न्यूनीकरण गर्ने र स्थानीयवासीको सुरक्षा सुनिश्चित गर्ने उद्देश्यले लिएको जनाएको छ । साथै, स्तरउन्नतिको काम सकिएपछि सो सडक खण्ड अझ सुरक्षित र सहज हुने विश्वाससमेत व्यक्त गरिएको छ । स्थानीयवासी तथा यात्रुहरूलाई सूचना पालन गर्न र सम्भावित जोखिमबाट जोगिनुमा सहयोग पुर्याउन आग्रह गरिएको छ ।