नेचासल्यानमा अपांगता भएका व्यक्तिहरुका लागि स्वास्थ्य शिविर सञ्चालन

असार १३, सोलुखुम्बु । सोलुखुम्बुको नेचासल्यान गाउँपालिकामा अपांगता भएका व्यक्तिहरुका लागि विशेष स्वास्थ्य जाँच तथा उपचार शिविर सञ्चालन गरिएको छ । शुक्रबारबाट सुरु भएको उक्त शिविर कोशी प्रदेश सामाजिक विकास मन्त्रालय, करुणा फाउन्डेसन र नेचासल्यान गाउँपालिकाको संयुक्त लगानी साझेदारीमा सञ्चालन गरिएको हो ।

गाउँपालिकाको महिला तथा बालबालिका शाखा प्रमुख अस्मिता भुजेलका अनुसार, अपांगता रोकथाम तथा पुनःस्थापना कार्यक्रमअन्तर्गत सञ्चालन भएको शिविरमा पहिलो दिन वडा नम्बर १ र २ का करिब ३४ जना अपांगता भएका व्यक्तिहरुले सेवा लिएका छन् । शिविरमा नेचासल्यान प्राथमिक अस्पतालका मेडिकल अफिसरहरूले बिरामीहरूको स्वास्थ्य परीक्षण गरी आवश्यक औषधोपचार प्रदान गरेका छन् ।

गाउँपालिकाले विगतदेखि नै अपांगता भएका व्यक्ति तथा उनीहरूको परिवारको स्वास्थ्य अवस्था सुधार गर्न नियमित स्वास्थ्य सेवा उपलब्ध गराउँदै आएको जनस्वास्थ्य निरीक्षक केशव बास्तोलाले जानकारी दिनुभयो । उपचारका लागि पहिचान गरिएका अन्य अपांगता भएका व्यक्तिहरुसमक्ष पनि स्वास्थ्य सेवाको पहुँच पु¥याउने उद्देश्यले कार्यक्रम सञ्चालन गरिएको हो ।

वडा नम्बर ३, ४ र ५ का लागि असार १४ गते पुनः शिविर सञ्चालन गरिने सहकर्मी सोभित ढुंगेलले नेचाबाट जानकारी दिनुभयो । गाउँपालिकाले आगामी दिनहरूमा पनि यस्ता कार्यक्रमलाई निरन्तरता दिने प्रतिबद्धता जनाएको छ ।