हराएको नगद र कागजात सहितको पस बुझाउँदै सोलुका अटो चालक घिमिरेले दिए इमान्दारीको उदाहरण

असार १४, सोलुखुम्बु । सोलुखुम्बु जिल्लाको सोलुदुधकुण्ड नगरपालिका–४ फाप्लुका ३५ वर्षीय अटो चालक दिलकुमार घिमिरेले हराएको नगद र महत्वपूर्ण कागजातसहितको पस फेला पारेर सम्बन्धित निकायमा बुझाउँदै उच्च इमान्दारीको परिचय दिएका छन् । शनिबार दिउँसो फाप्लुबाट सल्लेरीतर्फ अटो चलाउँदै गर्दा सदरमुकाम नजिक हुलाक कार्यालय छेउमा घिमिरेले सडकमा छोडिएको भेट्टाएका थिए । उनले झोलाको भित्री सामग्री जाँच गर्दा नेपाली ३९,६०० रुपैयाँ, भारतीय १,११० रुपैयाँ, अमेरिकी डलर ४२० र युरो १,१६० नगद, साथै पासपोर्ट, र अन्य महत्वपूर्ण कागजातहरू रहेको बताएका छन् ।

इमान्दारीपूर्वक व्यवहार गर्दै उनले उक्त पस जिल्ला प्रहरी कार्यालय सोलुखुम्बुमा बुझाएका थिए । प्रहरी नायब उपरीक्षक (डिएसपी) मनोजित कुवँरको रोहवरमा झोला सम्बन्धित व्यक्ति, पश्चिमकी २४ वर्षीया अन्जना थापालाई हस्तान्तरण गरिएको थियो । अन्जना विगत केही वर्षदेखि विदेशमा बसोबास गर्दै आएकी थिइन् र हाल सोलुखुम्बु भ्रमणमा आएकी हुन् । डिएसपी कुवँरले अटो चालक घिमिरेको इमान्दारीप्रति विशेष प्रशंसा गर्दै समाजमा यस्ता इमान्दार नागरिकको आवश्यकता रहेको बताउनुभयो ।घिमिरेजस्तो व्यक्तिहरूले नै समाजमा सकारात्मकता फैलाउँछ भन्दै प्रशंसा गर्नुभएको छ ।

साथै उहाँले नागरिकहरूलाई आफ्ना सामग्रीको सुरक्षा र सावधानी अपनाउन आग्रहसमेत गर्नुभयो । सामान फिर्ता पाएपछि थापाले पनि चालक घिमिरेप्रति कृतज्ञता व्यक्त गर्दै भन्नुभयो, “मैले कल्पना पनि गरेकी थिइनँ कि मेरो सबै महत्वपूर्ण कागजात र पैसा यति सुरक्षित तरिकाले फिर्ता पाइन्छ । घिमिरे सरप्रति म गहिरो सम्मान प्रकट गर्न चाहन्छु।” अटो चालक घिमिरेको यो इमान्दारीको कार्यले न केवल उनीप्रति विश्वास बढाएको छ, तर सम्पूर्ण समुदायमा नै सद्भाव, निष्ठा र सहकार्यको प्रेरणा प्रदान गरेको छ ।