जिल्ला प्रहरी कार्यालय सोलुखुम्बु परिसरमा वृक्षारोपण : वातावरण संरक्षणमा सहकार्यको उदाहरण

असार १४, सोलुखुम्बु । राष्ट्रिय वृक्षारोपण दिवसको अवसर पारेर सोलुखुम्बुमा वृक्षारोपण कार्यक्रम सम्पन्न भएको छ । डिभिजन वन कार्यालय सोलुखुम्बुको आयोजनामा जिल्ला प्रहरी कार्यालय सोलुखुम्बु परिसरमा शनिवार वृक्षारोपण गरिएको हो । कार्यक्रम अन्तर्गत गुँरास, मयुरपंखी र जापानिज धुपी  ३०/३० वटा गरी जम्मा ९० वटा विरुवा रोपिएको डिभिजन वन कार्यालय सोलुखुम्बुका प्रमुख रामजी शाहले जानकारी दिनुभयो ।

वृक्षारोपण कार्यक्रममा प्रमुख जिल्ला अधिकारी घिमिरेले वृक्षारोपण अभियानले दिगो वातावरणीय संरक्षणतर्फ मार्गनिर्देशन गर्ने उल्लेख गर्नुभयो । यस्तै जिल्ला न्यायधिश चन्द्र कुमार पोखरेलले वातावरण संरक्षण र हरियाली अभियानमा सरकारी निकायहरूको सहकार्य आवश्यक रहेको बताउँदै यस्ता कार्यहरूले सामुदायिक सचेतना अभिवृद्धि गर्ने विश्वास व्यक्त गर्नुभयो । यता प्रहरी नायव उपरीक्षक मनोजित कुँवरले प्रहरी कार्यालय परिसरमा हरियाली विस्तार गर्नु कार्यालयको सौन्दर्यवृद्धि मात्र नभई सकारात्मक वातावरण निर्माणमा सहयोग पुर्याउने बताउनुभयो ।

यस प्रकारका सहकार्यले सरकारी संयन्त्रबीच समन्वयको राम्रो अभ्यास प्रस्तुत गर्नुका साथै वातावरण संरक्षणप्रतिको साझा प्रतिबद्धता झल्किएको छ । उक्त कार्यक्रममा जिल्ला न्यायधिवक्ता रुद्र प्रसाद आचार्य, श्रेष्तादार विकास रजुक, प्रमुख सेनानी विजय आङ्दावे र शसस्त्र प्रहरी गुल्मपति प्रहरी नायव उपरीक्षक गोविन्द पोखरेल लगायतको उपस्थिति थियो ।