सोताङमा कृषक, व्यापारी र सरोकारवाला सँग अन्तरक्रिया कार्यक्रम

असार १४, सोलुखुम्बु । सोलुखुम्बुको सोताङ गाउँपालिकामा कृषक, व्यापारी तथा सरोकारवाला सँग अन्तरक्रिया कार्यक्रम सम्पन्न गरिएको छ । शुक्रबार आयोजित उक्त कार्यक्रम भेटेरिनरी अस्पताल तथा पशु सेवा विज्ञ केन्द्र सोलुखुम्बुको आयोजनामा गरिएको हो । कार्यक्रम भेटेरिनरी अस्पताल तथा पशु सेवा विज्ञ केन्द्र सोलुखुम्बुका प्रमुख भिम लाल तामाङको अध्यक्षता तथा सोताङ गाउँपालिका अध्यक्ष खिलराज बस्नेतको प्रमुख आतिथ्यतामा सञ्चालन गरिएको थियो ।

प्रमुख अतिथि बस्नेतले कार्यक्रमले कृषक र व्यवसायीक पशुपालनमा संलग्न व्यक्तिहरूलाई प्रत्यक्ष रुपमा लाभ पुग्ने विश्वास व्यक्त गर्दै किसानका समस्याहरूको समाधानमा स्थानीय तहले साथ दिने प्रतिबद्धता जनाउनुभयो । कार्यक्रममा पशुपालन, पशु स्वास्थ्य, बजार पहुँच, व्यवसायिक उत्पादन प्रणाली लगायतका विषयमा छलफल गरिएको थियो ।

कृषक, व्यापारी तथा पशु सेवा क्षेत्रका सरोकारवालाबीच खुलेर विचार आदान–प्रदान गरिएको कार्यक्रममा कृषकहरूले आफ्ना समस्याहरू राखेका थिए भने सरोकारवालाहरूले तिनीहरूको समाधानका उपायहरू प्रस्तुत गरेका थिए । कार्यक्रममा प्रमुख प्रशासकिय अधिकृत श्रीध्वज राई लगायत कृषक, स्थानीय व्यापारी, पशु प्राविधिक तथा सरकारी निकायका प्रतिनिधिहरूको उपस्थिति रहेको थियो ।