सोलुखुम्बुमा यस वर्षको एसईईमा ९३.३६ प्रतिशत विद्यार्थी उत्तीर्ण

असार १४, सोलुखुम्बु । माध्यमिक शिक्षा परीक्षा (एसईई) मा सोलुखुम्बु जिल्लाका ९३.३६ प्रतिशत विद्यार्थी उत्तीर्ण भएका छन् । राष्ट्रिय परीक्षा बोर्डले यस वर्षको शुक्रबार सार्वजनिक गरेको नतिजा अनुसार २०८१ सालको एसईईमा जिल्लाबाट सहभागी विद्यार्थीमध्ये अधिकांशले सफलता प्राप्त गरेका हुन् । शिक्षा विकास तथा समन्वय इकाइ सोलुखुम्बुका प्रमुख पुण्यराज डंगोलका अनुसार, कुल १ हजार ६५८ जना विद्यार्थी परीक्षामा सहभागी भएका थिए । तीमध्ये १ हजार ५४८ जना उत्तीर्ण भएका छन् भने ११० जनाको ननग्रेड आएको छ । साधारण धार (जनरल स्ट्रिम) तर्फ १ हजार ४७५ जना सहभागी भएका थिए, जसमा १ हजार ३८४ जना उत्तीर्ण भएका छन्। त्यस्तै, प्राविधिक धारमा ९७ जनाले परीक्षा दिएका थिए, जसमा ९३ जना विद्यार्थीले सफलता हासिल गरेका छन् । ग्रेड वृद्धि (ग्रेड इम्प्रुभमेन्ट) तर्फ ८६ जना विद्यार्थी सहभागी भएका थिए । तीमध्ये ७१ जना विद्यार्थी उत्तीर्ण भएका छन् ।

विद्यार्थीहरूको ग्रेडिङ निम्नानुसार रहेको छः

१.६ देखि २.० जीपीएः २ जना

२.० देखि २.४० जीपीएः १० जना

२.४० देखि २.८० जीपीएः १४७ जना

२.८० देखि ३.२० जीपीएः ६०५ जना

३.२० देखि ३.६० जीपीएः ६५६ जना

३.६० देखि ४.०० जीपीएः ५७ जना

यसरी, जिल्लाको समग्र नतिजा सकारात्मक देखिएको छ। शिक्षाविद्हरूले विद्यार्थी, शिक्षक, अभिभावक र विद्यालय प्रशासनको समन्वयात्मक प्रयासले यस वर्षको एसईई नतिजामा उल्लेखनीय सुधार आएको बताएका छन्।