सोताङको सार्वजनिक सुनवाई सम्पन्न, शिक्षा, स्वास्थ्य र खानेपानीलाई प्राथमिकता दिइएको अध्यक्ष बस्नेतको भनाई 

सोलुखुम्बु, असार १६ ।  सोलुखुम्बुको सोताङ गाउँपालिकाले सार्वजनिक सुनवाई सम्पन्न गरेको छ ।  सोमबार रेडियो एभरेष्टको सहजिकरण तथा गाउँपालिकाको आयोजनामा गाउँपालिकामा चालु आर्थिक वर्ष २०८१÷८२ मा भए गरेका काम, सेवा प्रवाह र बजेटको सार्वजनिक सुनवाई सम्पन्न गरेको हो ।  गाउँपालिका अध्यक्ष खिलराज बस्नेतको अध्यक्षतामा सम्पन्न कार्यक्रममा गाउँपालिकाले चालु आर्थिक वर्षको बजेटको ७१ प्रतिशत खर्च गरिसकेको जानकारी गराइएको छ ।

सार्वजनिक सुनवाई कार्यक्रमको अध्यक्षता तथा गाउँपालिका अध्यक्ष खिलराज बस्नेतले गाउँपालिकाले शिक्षा, स्वास्थ्य र खानेपानीको क्षेत्रमा नागरिकले महसुस गर्नेगरी काम गरिएको जिकिर गर्नुभएको थियो । उहाँले जनताको आँगनको सरकार स्थानीय सरकारलाई जनतामुखी बनाउँदै नागरिकका आशा, अपेक्षा र आवश्यकता बुझ्न जनताको घरसम्मै गाउँपालिका पुग्ने गरेको पनि बताउनुभएको थियो । उहाँले गाउँपालिकाभित्रका सडकलाई वर्षभरी सञ्चालन गर्नका लागी आवश्यक उपकरण तयार राख्नेगरी काम गर्ने पनि प्रतिबद्धता व्यक्त गर्नुभएको थियो ।

 सुनुवाइका क्रममा गाउँपालिका उपाध्यक्ष अन्जु नाछिरिङले गाउँपालिकामा सञ्चालन हुने योजना तथा कार्यक्रमहरूको अनुगमनलाई प्रभावकारी ढङ्गले अगाडि बढाइरहेको बताउनुभएको थियो ।  यस्तै सार्वजनिक सुनवाईमा बोल्दै गाउँपालिकाका प्रमुख प्रशासकीय अधिकृत श्रीध्वज राईले नागरिकको सेवामा कुनै कन्जुस्याँइ नगरिएको बताउँदै कर्मचारी अभावमा नागरिक सेवा प्राप्त नगरी फर्कनुपर्ने अवस्था गाउँपालिकामा नरहेको दावी गर्नुभएको थियो ।

उहाँले गाउँपालिकाले चालु आर्थिक वर्षको अन्त्य सम्मका ८५ प्रतिशत बजेट खर्च गर्ने गरि लक्ष तय गरिएको उल्लेख गर्नुभयो ।  सार्वजनिक सुनवाईमा गाउँपालिकाको वडा नम्बर १ का अध्यक्ष जङ्ग गुरुङ, नेपाली काङ्ग्रेसका गाउँपालिका सचिव जीवन काेइराला, नेकपा एमाले पालिका कमिटी अध्यक्ष धनकुमार बिक लगायत स्थानीय नागरिकहरूले सवाल उठाएका थिए । कार्यक्रममा गाउँपालिकाका विषयगत शाखाका प्रमुख एवं कर्मचारी, स्थानीयको बाक्लो उपस्थिति रहेको थियो ।