साेलुका यातायात व्यवसायी र प्रशासन बीच अन्तरकृया, 

असार १८, साेलुखुम्बु । जिल्ला प्रशासन कार्यालय सोलुखुम्बुले जिल्ला स्थित यातायात व्यवसायीहरूसँग छलफल तथा अन्तरकृया गरेको छ ।  जिल्लामा रहेर यातायात व्यवसाय गर्ने यातायात व्यवसायीहरूसँग उनीहरूको समस्या लगायत विषयको जानकारी लिने हेतुले अन्तरकृया कार्यक्रम गरिएको हो ।

जिल्ला प्रशासन कार्यालयमा प्रमुख जिल्ला अधिकारी अनाज कुमार घिमिरेको नेतृत्वमा सम्पन्न छलफलमा जिल्ला स्थित यातायात व्यवसायीहरू अटो, सुमो तथा बसका सञ्चालक एवं प्रतिनिधिको उपस्थिति रहेको थियो । उनीहरूले विशेषतः बिहानी समयमा गाडी छुट्ने समय निर्धारणका लागी जिल्ला प्रशासन सँग माग गरेका छन् भने अन्य सडक सुरक्षा लगायतका विषयमा छलफल भएको थियो ।

छलफलमा सोलुदुधकुण्ड नगरपालिकाका उपप्रमुख गान्धीमाया तामाङ, जिल्ला प्रहरी कार्यालय सोलुखुम्बुका डीएसपी मनोजित कुँवर, शसस्त्र प्रहरी वल सोलुखुम्बुका डीएसपी गोविन्द पोखरेल, राष्ट्रिय अनुसन्धानका प्रमुख सरोज तिवारी लगायत यातायात व्यवसायीहरूको उपस्थिति रहेको थियो ।  

छलफलका क्रममा प्रमुख जिल्ला अधिकारी घिमिरेले यातायात व्यवसायीहरूले जथाभावी पार्किङ, सडक सुृरक्षा, फोहोरमैला व्यवस्थापन, हर्न आतङ्क अस्वस्थ प्रतिष्पर्धा लगायत समस्या समाधान गर्न प्रशासनले निष्कर्ष निकाल्ने कुरामा प्रतिवद्धता व्यक्त गर्नुभएको छ ।  उहाँले व्यवसायीहरुलाई नियमकानुन भन्दा माथि कोही नहुने भएकाले नियम कानुन अनुसार सवारी साधन सञ्चालन गर्न निर्देशन दिनुभयो ।