शिक्षकप्रति राज्यको सम्मान अपर्याप्त भएको जिल्ला समन्वय प्रमुख निरौलाको भनाइ

असार २०, सोलुखुम्बु । जिल्ला शिक्षा समन्वय समिति अध्यक्ष तथा जिल्ला समन्वय समिति सोलुखुम्बुका प्रमुख कृष्ण प्रसाद निरौलाले शिक्षकलाई राज्यले उचित सम्मान गर्न नसकेको टिप्पणी गर्नुभएको छ । नेपाल विद्यार्थी संघ, सोलुखुम्बुद्वारा आयोजित कक्षा १२ उत्रीण विद्यार्थी सम्मान तथा बधाई कार्यक्रममा बोल्दै उहाँले यस्तो धारणा राख्नुभएको हो ।

कार्यक्रममा नेपाली कांग्रेसका महासमिति सदस्य नवीन थापाले पनि शैक्षिक क्षेत्रमा सुधारको नाममा शिक्षकको अपमान गर्नु मूर्खता भएको बताउनुभएको छ । उहाँले राजनीतिक आस्थाका आधारमा स्थानीय सरकारले शिक्षकलाई काखा–पाखा गर्ने प्रवृत्तिप्रति गम्भीर चिन्ता व्यक्त गर्नुभयो । कार्यक्रममा कांग्रेस नेता बलबहादुर बस्नेत, नेविसंघ सोलुखुम्बुका अध्यक्ष नवीन बस्नेत, वडा सभापति भीमबहादुर बस्नेत, उपसभापति हिरे राई लगायतले आ–आफ्ना धारणा राख्दै विद्यार्थीको उत्साहवर्धन र शिक्षकको सम्मान अपरिहार्य रहेको बताएका छन् ।

नेविसंघ सोलुखुम्बुका सचिव निश्चल राईका अनुसार विद्यार्थी नेता सुजन कार्कीको सभापतित्वमा सम्पन्न उक्त कार्यक्रममा २१ जना विद्यार्थीहरूलाई सम्मान गरिएको थियो । कार्यक्रमले शिक्षा क्षेत्रमा देखिएको वर्तमान समस्यामाथि गम्भीर बहसको थालनी गराएको छ भने विद्यार्थीको प्रोत्साहनका लागि यस्ता कार्यक्रम निरन्तर आवश्यक रहेको सहभागीहरूले बताएका छन् ।