असार २०, सोलुखुम्बु । उदयपुरको रौतामाई गाउँपालिका स्थित जनता माध्यमिक विद्यालय, नौलेका प्रधानाध्यापक दिपक परियार शैक्षिक सत्र २०८१ को कार्यसम्पादन मूल्याङ्कनमा माध्यमिक तह (कक्षा १–१०) का लागि पालिकाभरिका विद्यालयहरूमध्ये सर्वोत्कृष्ट प्रधानाध्यापक घोषित भई सम्मानित हुनुभएको छ । गाउँपालिकाले बिहीबार आयोजना गरेको विशेष कार्यक्रममा परियारलाई नगद ७५,००० रुपैयाँ र सम्मानपत्रसहित सम्मान गरिएको हो ।
उहाँको नेतृत्वमा विद्यालयले शैक्षिक गुणस्तर सुधार, विद्यार्थीको उपस्थिति वृद्धि तथा शैक्षिक नवप्रवर्तनमा उल्लेखनीय योगदान दिएको भन्दै गाउँपालिकाले यो सम्मान प्रदान गरेको हो । उक्त कार्यक्रममा सोही विद्यालयका सहायक प्रधानाध्यापक विशाल बजगाई पनि विज्ञान विषयमा पालिका स्तरीय सर्वोत्कृष्ट शिक्षक घोषित भई नगद ५,००० रुपैयाँ तथा सम्मानपत्रसहित सम्मानित हुनुभएको उदयपुरबाट मिलन परियारले जानकारी दिनुभयो ।
रौतामाई गाउँपालिकाका अनुसार शैक्षिक क्षेत्रलाई अझ प्रेरित र प्रभावकारी बनाउन, शिक्षकहरूको मनोबल वृद्धि गर्न र उत्कृष्ट कार्य गर्ने शैक्षिक व्यक्तित्वलाई प्रोत्साहन दिन यो सम्मान कार्यक्रमको आयोजना गरिएको हो । कार्यक्रममा पालिकाका प्रमुख, जनप्रतिनिधि, शिक्षक, अभिभावक तथा विद्यार्थीहरूको उपस्थिति रहेको थियो । सम्मानित प्रधानाध्यापक परियारले आफ्नो सम्मान सम्पूर्ण शिक्षक टिम र विद्यालय परिवारलाई समर्पित गर्दै आगामी दिनमा अझ प्रभावकारी शैक्षिक अभियान सञ्चालन गर्ने प्रतिबद्धता जनाउनुभएको छ ।
Discussion about this post