लिखुपिके गाउँपालिकाले गर्यो दलित समुदायलाई प्रविधि हस्तान्तरण, पुर्खौली पेशामा आत्मनिर्भरता ल्याउने प्रयास

असार २०, सोलुखुम्बु । सोलुखुम्बुको लिखुपिके गाउँपालिकाले पालिकाभित्र रहेका दलित समुदायका लागि पुर्खौली पेशा संरक्षण तथा प्रवद्र्धन गर्न प्रविधि हस्तान्तरण गरिएको छ । गाउँपालिकाकी अध्यक्ष मिना कार्की बस्नेत र उपाध्यक्ष ङवाङ ल्हाक्पा शेर्पाको विशेष उपस्थितिमा आयोजित कार्यक्रममा ३८ घरपरिवारलाई विभिन्न आधुनिक उपकरण तथा सामग्री वितरण गरिएको हो ।

प्रविधि हस्तान्तरण कार्यक्रम अन्तर्गत हाते औजार, आधुनिक कुटानी–पिसानी मेसिन, सिलाइ मेसिन, फलाम तथा धातुमा काम गर्न आवश्यक उपकरणहरू वितरण गरिएको गाउँपालिकाले जनाएको छ । कार्यक्रमको उद्देश्य दलित समुदायको पारम्परिक सीपलाई संरक्षण गर्दै नयाँ प्रविधिसँग जोडेर उनीहरूको आयआर्जनमा वृद्धि र जीवनस्तरमा सुधार ल्याउनु रहेको बताइएको छ ।

गाउँपालिका अध्यक्ष कार्कीले “पारम्परिक सीप र पुख्र्यौली पेशालाई नयाँ प्रविधिसँग जोड्दा मात्र दीगो विकास सम्भव हुन्छ,” भन्दै यस्ता कार्यक्रमले आत्मनिर्भर र सम्मानजनक जीवनयापनको बाटो खोल्ने विश्वास व्यक्त गर्नुभयो । कार्यक्रममा सहभागी समुदायका प्रतिनिधिहरूले यस्तो सहयोगले आफ्नो कामलाई थप सहज बनाएको भन्दै नियमितरूपमा व्यावसायिक तालिम र उपकरण सहयोगको माग गरेका छन्।

उनीहरूले गाउँपालिकाले अघि सारेको योजनालाई सकारात्मक पहलको रूपमा स्वागत गरेका छन् । गाउँपालिकाले आगामी दिनमा अझ प्रविधिमैत्री योजना ल्याई समुदायको सीप विकास र आर्थिक उत्थानमा योगदान पुर्याउने तयारी गरिरहेको जानकारी गराएको छ । यस प्रकारका कार्यक्रमले सामाजिक समावेशिता र समान अवसर सुनिश्चित गर्न मद्दत पुग्ने अपेक्षा गरिएको छ।