रावाबेसीबाट एक करोड हाराहारीको लिची बिक्री

असार २०, सोलुखुम्बु । खोटाङको रावाबेसी गाउँपालिकाका किसानले लिची बेचेर करिब एक करोड आर्जन गरेका छन् । यो पालिकामा यसपटक १८४ मेट्रिक टन लिची उत्पादन भएको छ । ६ वडा रहेको यो गाउँपालिका–१ कुभिण्डेमा सबैभन्दा बढी ८८ मेट्रिक टन लिची उत्पादन भएको जनाइएको छ । कुभिण्डेमा ११ हेक्टरमा लगाइएको लिचीले उत्पादन दिन थालेको गाउँपालिकाका कृषि शाखा प्रमुख उद्धव बास्तोलाले बताउनुभयो ।

पालिकाको वडा नं २ खार्पामा २४ मेट्रिक टन, वडा नं ३ लामीडाँडामा १६, वडा नं ४ धारापानीमा १६, वडा नं ५ दुवेकोलमा आठ र वडा नं ६ हौँचुरमा ३२ मेट्रिक टन उत्पादन भएको छ । आफूले ३० हजारको लिची बिक्री गरेको कुभिण्डेस्थित लाङ्घाली चोकका प्रेमबहादुर मगरले बताउनुभयो । सोही स्थानका खड्गप्रसाद रेग्मीले ४५ हजारका लिची बेचिसक्नु भयो । केही किसानले एक लाख भन्दा बढीका लिची बेचिसकेका कुभिण्डेका वडाध्यक्ष गेहेन्द्रमान राईले जानकारी दिनुभयो । रावाबेँसीका किसानले लिचीबाट यसपटक ९५ लाख हाराहारी आम्दानी गरेका उहाँको अनुमान छ ।

रावाबेँसी गाउँपालिकालाई लिची उत्पादनको ‘हब’को रुपमा विकास गर्नेगरी यही असार १० गते सम्पन्न १७ औँ गाउँसभामार्फत नीति तथा कार्यक्रम पारित गरिएको गाउँपालिका प्रमुख फटिककुमार श्रेष्ठले बताउनुभयो । रावाबेँसी गाउँपालिकाले लिची उत्पादनमा हासिल गरेको यो सफलताले गाउँको आर्थिक समृद्धिमा ठूलो योगदान पु¥याएको छ ।