असार २०, सोलुखुम्बु । सोलुखुम्बुको सोलुदुधकुण्ड नगरपालिकामा एसईई नतिजा सम्बन्धी अन्तरक्रिया तथा समीक्षात्मक कार्यक्रम सम्पन्न गरिएको छ । नगर शिक्षा शाखाको आयोजनामा शुक्रबार माध्यमिक शिक्षा परीक्षा (एसईई) को नतिजा सम्बन्धी अन्तरक्रिया तथा समीक्षात्मक कार्यक्रम सम्पन्न गरिएको हो । कार्यक्रममा २०७४ देखि २०८१ सालसम्मको एसईई नतिजाको समग्र समीक्षा गरिएको नगरपालिकाले जनाएको छ ।
नगर प्रवक्ता फुर्वा ग्याल्जेन शेर्पाका अनुसार कार्यक्रममा विगत आठ वर्षको एसईई नतिजाको विश्लेषण गर्दै शिक्षाको गुणस्तर सुधारका लागि सुझाव संकलन तथा मार्गदर्शन प्रदान गरिएको थियो। नगर प्रमुख शेर्पाले विद्यालयको शैक्षिक सुधारका लागि शिक्षक, अभिभावक र विद्यालय व्यवस्थापन समितिबीचको समन्वय र सहकार्य अपरिहार्य रहेको बताउँदै सबै पक्षले साझा उत्तरदायित्वका साथ अघि बढ्नुपर्नेमा जोड दिनुभयो ।
यस्तै उपप्रमुख गान्धी माया तामाङले विद्यार्थीहरूको सिकाइ स्तर वृद्धि गर्न सिकाइमैत्री वातावरण निर्माण गर्नुपर्ने आवश्यकता औंल्याउनुभयो । कार्यक्रममा नगर शिक्षा शाखा, विद्यालय व्यवस्थापन समिति, सामुदायिक तथा संस्थागत विद्यालयका प्रधानाध्यापकहरू तथा सम्बन्धित वडाका वडा अध्यक्षहरूको उल्लेख्य उपस्थिति रहेको थियो । कार्यक्रमले नगर क्षेत्रभित्रका विद्यालयहरूको एसईई नतिजा सुधारका लागि भावी शैक्षिक रणनीतिहरू निर्माण गर्न महत्वपूर्ण आधार तयार गरेको बताइएको छ ।
Discussion about this post