खोटाङमै पहिलो पटक रोपिएको सरकारी आलुको उत्पादन उत्साहजनक 

असार २०, सोलुखुम्बु ।  खोटाङमै पहिलो पटक जन्तेढुङ्गामा सरकारी लगानीमा रोपिएको आलुको उत्पादन उत्साहजनक देखिएको छ । जिल्लामै गाउँपालिकाले वडा नम्बर ४ स्थित भञ्ज्याङखर्क रहेको सरकारी र निजी गरि ६१ रोपनी जग्गामा रोपेको आलुको उत्पादन उत्साहजनक भएको हो ।  

आन्तरिक आय वृद्धि गर्ने र गाउँपालिकामा कृषिको सम्भावना उजागर गर्नका लागी सरकारी लगानीमा रोपिएको आलुको उत्पादन उत्साहजनक रहेको गाउँपालिकाले जनाएको छ ।  लेकाली भेग समेत रहेको भञ्ज्याङखर्कमा आलु उत्पादन गर्न सकिने उदाहरण पेश गर्नका लागी गाउँपालिकाले सुरु गरेको अभ्यासको प्रतिफल यस पहिलो पटक करिव ४ टन आलु उत्पादन हुने आँकलन गरिएको गाउँपालिकाका प्रमुख प्रशासकीय अधिकृत विनय निरौलाले बताउनुभयो ।

पहिलो चरणमा करिव ६५ प्रतिशत आलु खन्दा २ हजार ५ सय टन बढी उत्पादन भएको छ ।  उक्त आलु अहिले स्थानीय चिसापानी बजारमा ५५ रुपैयाँ किलो बिक्रीवितरण भइरहेको अधिकृत निरौलाले बताउनुभयो । स्थानीय राजस्व परामर्श समितिले निर्धारण गरेको दररेट अनुसार आलुको विक्रीवितरण भइरहेको गाउँपालिका उपाध्यक्ष खेम खड्काले बताउनुभयो ।  वर्षौदेखी बाँझो जमिनलाई सदुपयोग गरेर जिल्लामै पहिलो पटक खोटाङको जन्तेढुंगा गाउँपालिकाले सरकारी लगानीमा आलु रोपेको थियो ।