एसईई २०८१ मा सफल विद्यार्थीहरू सम्मानित

असार २०, सोलुखुम्बु । ओखलढुंगाको सिद्धिचरण नगरपालिका–२ स्थित हिमालय माध्यमिक विद्यालयको आयोजनामा र वडा स्तरीय बाल संरक्षण समितिको प्रायोजनमा आयोजित “एसईई २०८१ सफल विद्यार्थी सम्मान कार्यक्रम सम्पन्न भएको छ । कार्यक्रममा २०८१ सालको एसईई परीक्षामा सफलता हासिल गरेका हिमालय मावि, कडेनी मावि, तथा छिमेकी विद्यालयहरू नारायणस्थान मावि, जनचेतना मावि, र महेश्वर माविका उत्कृष्ट जिपिए हासिल गर्ने विद्यार्थीहरूलाई सम्मान गरिएको हो ।

हिमालय माविबाट ३६ जना, कडेनी माविबाट ९ जना, नारायणस्थान माविबाट २ जना, जनचेतना माविबाट २ जना, र महेश्वर माविबाट २ जना गरी कुल ५१ जना विद्यार्थीहरूलाई सम्मानपत्र र पुरस्कार प्रदान गरिएको वडा नं. २ का वडा अध्यक्ष वसन्त कट्वालले जानकारी दिनुभयो । कार्यक्रमले विद्यार्थीहरूमा थप उत्साह र प्रेरणा जगाउने विश्वास गरिएको छ। यस अवसरमा विद्यालयका शिक्षक, अभिभावक, विद्यार्थीहरू तथा स्थानिय समुदायको उल्लेख्य सहभागिता रहेको थियो ।