सोलुदुधकुण्ड–११ मा कृषकलाई कृषि औजार वितरण, कृषक उत्साहित

असार २२, सोलुखुम्बु । सोलुखुम्बुको सोलुदुधकुण्ड नगरपालिका–११ मा आयोजित कृषि औजार वितरण कार्यक्रममा स्थानीय कृषकहरू अत्यन्त उत्साहित भएका छन् । आईतबार सम्पन्न कार्यक्रममा १३ वटा कृषक समूहलाई २६ थान मिनिटिलर, ८ थान कम्बाइन मिलसहित विभिन्न आधुनिक कृषि औजारहरू वितरण गरिएको हो ।
नगरपालिकाको आर्थिक वर्ष २०८१/०८२ को वार्षिक स्वीकृत “कृषि यन्त्रीकरण प्रवद्र्धन कार्यक्रम” अन्तर्गत सञ्चालित यस कार्यक्रममा कृषकहरूले आधुनिक औजार पाएसँगै आत्मबल बढेको र उत्पादनमुखी कृषि प्रणालीतर्फ अघि बढ्न प्रेरणा मिलेको प्रतिक्रिया दिएका छन् ।

कार्यक्रममा सोलुदुधकुण्ड नगरपालिकाका मेयर नाम्गेल जाङ्बु शेर्पाले कृषि यान्त्रीकरणले कृषकहरुको श्रम र समयको बचत हुने बताउँदै आधुनिक औजारको प्रयोगले उत्पादनमा वृद्धि आउने बताउनुभयो । नगरपालिकाका कृषकहरुको जीवनस्तर उकास्न निरन्तर प्रतिबद्ध रहेको बताउनुभयो । सोलुदुधकुण्ड नगरपालिकाकी उपमेयर गान्धि माया तामाङले यस्ता कार्यक्रमले स्थानीय कृषकलाई आत्मनिर्भर बनाउन सहयोग पुर्याउने विश्वास व्यक्त गर्नुभयो । उहाँले साना कृषक लक्षित यस्ता कार्यक्रमहरू अझ प्रभावकारी रुपमा विस्तार गर्दै लगिने बताउनुभयो ।

यस्तै वडा अध्यक्ष टंक बहादुर कार्कीले वडा नम्बर ११ लाई नमुना कृषक वडा बनाउने योजना रहेको उल्लेख गर्दै कृषकहरुलाई प्रविधिमैत्री बनाउने बताउनुभयो । नगरपालिकाले आगामी दिनमा अन्य वडाहरूमा पनि यस्ता कार्यक्रम विस्तार गर्दै लैजाने जानकारी दिएको छ । कृषकहरूलाई आधुनिक प्रविधि उपलब्ध गराई उत्पादन र आत्मनिर्भरतामा जोड दिन खोजिएको यो अभियानप्रति स्थानीय कृषकहरूको सकारात्मक प्रतिक्रिया प्राप्त भएको छ ।