ऐँसुलुखर्क गाउँपालिकाको पालिका बहस, पूर्वाधारका सबै काम सक्ने अध्यक्ष राईको भनाई

खोटाङ, असार २१ । खोटाङका ऐँसेलुखर्क गाउँपालिकाको पालिका बहस सम्पन्न भएकाे छ । रेडियो एभरेष्टको एभरेष्टको सहजिकरणमा तथा गाउँपालिकाको आयोजनामा बहस सम्पन्न भएको हो । वर्तमान व्यवस्थाप्रति जनताको चासो गुनासो तथा प्रश्न सुन्ने एवं सुशासन र पारदर्शिता प्रवर्द्धन गर्ने हेतुले गाउँपालिकाको आयोजनामा पालिका बहस सम्पन्न गरिएको छ । कार्यक्रममा गाउँपालिका अध्यक्ष गिरेन्द्र बहादुर राई, उपाध्यक्ष राजेशकुमार राजभण्डारी र गाउँपालिकाका प्रमुख प्रशासकीय अधिकृत रेख बहादुर थापाले सहभागीहरूले राखेका जिज्ञासाको जवाफ दिनुभएको थियो ।

बहसको क्रममा पत्रकार भानुभक्त निरौलाले राखेका जिज्ञासाको जवाफ दिँदै गाउँपालिका अध्यक्ष गिरेन्द्र बहादुर राईले गाउँपालिकाको ७ वटै वडाका नागरिकका समस्या समाधानका लागी गाउँपालिका हरदम लागी परिरहेको दावी गर्नुभएको थियो । उहाँले गाउँपालिकामा अघिल्लो सरकारले सुरु गरेका कार्यक्रम तथा योजनाहरूको कार्यान्वयन पाटोलाई आफ्नो नेतृत्वको सरकारले दृढकाका साथ लागू गरिरहेको बताउनुभएको थियो ।

उहाँले वर्तमान गाउँपालिका सरकारले विवादित पालिका भवन निर्माण सम्पन्न गर्न सफल भएको, पालिका अस्पताल निर्माण गर्न सफल भएको, गाउँपालिकाको वडा नम्बर १ र ३ लाई जोड्ने लिदिङ खोलामा मोटरेवल पुल निर्माणको काम अन्तिम चरणमा पुगेको लगायतका कामको बारेमा जानकारी गराउनु भएको थियो । उहाँले आम नागरिकका आशा र अपेक्षालाई ध्यानका राख्दै आगामी बाँकी कार्यकाललाई पनि प्रभावी र नागरिक मैत्री बनाउँदै लैजाने प्रतिवद्धता व्यक्त गर्नुभएको छ । यस्तै कार्यक्रममा गाउँपालिका उपाध्यक्ष राजेशकुमार राजभण्डारीले संविधानले उपाध्यक्षलाई दिएका जिम्मेवारीलाई र प्रभावकारी ढङ्गले बहन गरिरहेको उल्लेख गर्नुभएको थियो ।

उहाँले कार्यक्रममा योजना अनुगमन, न्यायिक निरुपण लगायत विषयमा आफूले विना कुनै पक्षपात काम गरेको उल्लेख गर्नुभएको थियो । यस्तै गाउँपालिकाका प्रमुख प्रशासकीय अधिकृत थापाले गाउँपालिकामा कर्मचारीको अभाव रहेको कुरा जानकारी गराउँदै कर्मचारी अभावका बावजुद सेवा प्रवाहमा कुनै कमी नराखिएको उल्लेख गर्नुभएको थियो । भौगोलिक कठिनाइ, विकटता जस्ता कारणका बावजुद गाउँपालिकामा खटिएका कर्मचारीले नागरिकको सेवामा दिएको तदारुकताको उहाँले खुलेर प्रशंसा गर्नुभएको थियो । बहसका क्रममा सहभागीहरूले उठाएका सवालहरुको गाउँपालिका अध्यक्ष राई, उपाध्यक्ष राजभण्डारी र प्रमुख प्रशासकीय अधिकृत थापाले सहजिकरण गर्नुभएको थियो ।

शिक्षाको क्षेत्रमा विद्यमान समस्यालाई समाधान गर्न गाउँपालिकाले लगानी गरिरहेको कार्यक्रममा सरोकारवाला पक्षले दावी ग¥यो । कार्यक्रममा गाउँपालिकाका विषयगत शाखाका प्रमुख एवं प्रतिनिधि, कर्मचारी लगायत आम सर्वसाधाराणको उपस्थिति रहेको थियो ।