सल्लेरीमा भेटेरिनरी अस्पतालको बजार अनुगमनः एउटै नाममा तीन मासु पसल, सरसफाइमा लापरबाही

असार २३, सोलुखुम्बु । सोलुखुम्बुस्थित भेटेरिनरी अस्पताल तथा पशु सेवा विज्ञ केन्द्रले जिल्ला सदरमुकाम सल्लेरीमा सञ्चालनमा रहेका मासु तथा डेरी पसलहरूको संयुक्त रुपमा अनुगमन गरेको छ । असार २२ र २३ गते गरिएको बजार अनुगमनमा ३२ वटा मासु तथा डेरी पसल अनुगमन गरिएका हुन् । भेटेरिनरी अस्पताल तथा पशु सेवा विज्ञ केन्द्र सोलुखुम्बु, घरेलु तथा साना उद्योग कार्यालय र जिल्ला प्रशासन कार्यालयको संयुक्त टोलीले गरेको अनुगमनका क्रममा व्यवसायिक अनुशासनको अभाव देखिएको छ ।

केन्द्रका प्रमुख भिमलाल तामाङका अनुसार एउटै नामबाट तीन वटा मासु पसल सञ्चालन गरिएको, कागजपत्र विना व्यवसाय सञ्चालन गरिएको र मासु पसलहरूमा सरसफाइको गम्भीर अभाव देखिएको छ । पसल सञ्चालकहरूलाई तत्काल कागजपत्र बनाउने, एउटै नाममा एकभन्दा बढी पसल नखोल्ने, र विशेषगरी सरसफाइमा ध्यान दिन प्रमुख तामाङले निर्देशन दिनुभयो ।

आईतबार २२ वटा पसल डेरी तथा एग्रोभेट र सोमबार १० वटा मासु तथा डेरी पसल अनुगमन गरिएको बताइएको छ । अनुगमनमा विशेषज्ञ डाक्टरहरुको सक्रिय सहभागीता रहेको थियो । बजार अनुगमनको मुख्य उद्देश्य उपभोक्तालाई सुरक्षित, स्वच्छ र गुणस्तरीय सेवा उपलब्ध गराउने तथा व्यवसायिक गतिविधिमा पारदर्शिता कायम गर्नु रहेको अनुगमनमा संलग्न निकायहरूले बताएका छन् । स्थानीय व्यवसायीलाई सचेत गराउँदै अनुगमन टोलीले आवश्यक परेमा थप कारबाही प्रक्रिया अघि बढाइने समेत जनाएको छ ।