खोटाङका प्रशान्त राईको मोटरसाइकल दुर्घटनामा परेर मृत्यु

असार २५, सोलुखुम्बु । ललितपुरमा गएराति भएको मोटरसाइकल दुर्घटनामा खोटाङका एक युवकको मृत्यु भएको छ । दुर्घटनामा परेका २९ वर्षीय प्रशान्त राईको पाटन अस्पतालमा उपचारको क्रममा ज्यान गएको हो। जिल्ला प्रहरी कार्यालय ललितपुरका अनुसार दुर्घटना आज राति सवा दुई बजे ललितपुर महानगरपालिका–२७, सुनाकोठीबाट ठेचोतर्फ जाँदै गरेको ना ६५ प ६५८ नम्बरको मोटरसाइकल अनियन्त्रित भई नालीमा ठोक्किँदा भएको थियो।

दुर्घटनामा गम्भीर घाइते भएका राईलाई तत्काल प्रहरीले उद्धार गरी पाटन अस्पताल पु¥याएको थियो । खोटाङ जिल्लाको दिक्तेल रुपाकोट मझुवागढी नगरपालिका–७ स्थायी घर भएका राईको बिहान ३ बजे उपचारका क्रममा मृत्यु भएको एसपी चक्रराज जोशीले जानकारी दिनुभयो । दुर्घटनाको थप अनुसन्धान भइरहेको प्रहरीले जनाएको छ । राईको शव हाल पाटन अस्पतालमै राखिएको छ ।