कृषि ज्ञान केन्द्रको फार्म व्यवस्थापन शाखा फाप्लुले ४९ औँ फार्म दिवस मनायो

असार २५, सोलुखुम्बु । कृषि ज्ञान केन्द्रको फार्म व्यवस्थापन शाखा, फाप्लुले ४९ औँ फार्म दिवस मनाइएको छ । बुधबार कृषि ज्ञान केन्द्रका प्रमुख दुर्गा बहादुर तिरुवाको अध्यक्षता तथा जिल्ला समन्वय समितिका प्रमुख कृष्ण प्रसाद निरौलाको प्रमुख आतिथ्यतामा फार्म दिवस मनाइएको हो । कार्यक्रममा प्रमुख तिरुवाले विगत ६ वर्षको चालु बजेट तथा राजस्वको विवरण प्रस्तुत गर्दै फार्म व्यवस्थापन शाखाको कार्य सम्पादन, चुनौती र आगामी योजना बारे जानकारी दिनुभयो ।

उहाँले दरबन्दी अनुसार कर्मचारी नहुनु, कृषि ज्ञान केन्द्र मर्ज भएपछि कर्मचारी अभाव तथा कार्यक्रम संचालनमा आएका समस्या, बजेटको न्यूनता, प्रविधि विस्तारमा कठिनाइ जस्ता चुनौतीहरू प्रस्ट पार्नुभयो । त्यस्तै, फार्म व्यवस्थापन शाखाले आगामी दिनमा फलफुलका विरुवा तथा तरकारी बीउको उत्पादन वृद्धि गरी जिल्लाबाहिर निर्यात गर्ने, प्रविधि प्रसारको थलोको रुपमा केन्द्रलाई विकास गर्ने, फलफुल प्रशोधन तथा भण्डारण प्रविधिको विस्तार गर्ने, काष्ठफल परियोजनाको सहयोगमा किवी ब्राण्डी उत्पादन गर्ने तथा विभिन्न फलफुलको जर्मप्लाजम संरक्षण गर्ने योजनाहरू सार्वजनिक गरिएको छ ।

साथै, स्थानीय तहका प्राविधिक कर्मचारीहरूलाई आवश्यकता अनुसार तालिम प्रदान गरिने योजना समेत रहेको जानकारी गराइएको आयोजकले जनाएको छ । कार्यक्रमका प्रमुख अतिथि निरौलाले परम्परागत खेती प्रणालीको सट्टा आधुनिक कृषि प्रणालीलाई प्राथमिकता दिनुपर्नेमा जोड दिनुभयो । सोलुदूधकुण्ड नगरपालिकाकी उपमेयर गान्धि माया तामाङले कृषि ज्ञान केन्द्र र नगरपालिकाबीचको सहकार्यलाई निरन्तरता दिइने बताउनुभयो ।

यस्तै प्रमुख जिल्ला अधिकारी अनोज कुमार घिमिरेले विगतका तुलनामा हाल कस्तो प्रगति भएको छ भनेर प्रश्न गर्दै केन्द्रको कार्यप्रगति प्रति चासो व्यक्त गर्नुभयो । उता, प्रधानमन्त्री कृषि आधुनिकीकरण परियोजना, इकाई ओखलढुंगाका प्रमुख हेम बहादुर आले मगरले फार्म व्यवस्थापन शाखाको थप उन्नतिको शुभकामना व्यक्त गर्नुभयो । कार्यक्रममा कृषि क्षेत्रका सरोकारवालाहरू, कर्मचारी तथा कृषकहरू सुरक्षकर्मी, संचारकर्मी लगायतको उपस्थिति रहेको थियो ।