भौतिक पूर्वाधार कार्यालय उद्‌घाटन गर्न मन्त्री राई सोलु आउँदै 

असार ३२, सोलुखुम्बु  । कोशी प्रदेशका भाैतिक पूर्वाधार विकास तथा स्वास्थ्य मन्त्री भुपेन्द्र राई सल्लेरी आउनुहुने भएको छ ।  उहाँ जिल्लामा भौतिक पूर्वाधार विकास कार्यालय स्थापनार्थ सोलुखुम्बुको सल्लेरी आउने कार्यक्रम तय भएको हो ।  प्रदेश भरिका १४ वटै जिल्लामा एक जिल्ला एक भौतिक पूर्वाधार विकास कार्यालय स्थापनाको अभियान लिएको मन्त्रालयले सोलुखुम्बुमा समेत कार्यालय स्थापना गर्ने भएको हो ।

 जिल्ला सदरमुकाम सल्लेरीमा १ गते कार्यालय स्थापना गरिने २ गते उद्‌घाटन गर्नका लागी मन्त्री राई सोलुखुम्बु आउने कार्यतालिका रहेको जनाइएको छ । १ गते दिक्तेलमा कार्यालय उद्‌घाटन गरेर २ गते सल्लेरी आइपुग्ने जनाइएको छ ।   जिल्ला समन्वय समितिको कार्यालय सल्लेरीमा पूर्वाधार विकास कार्यालय रहने जनाइएको छ ।  जिल्लामा कार्यालय स्थापना भएपछि भौतिक पूर्वाधार विकास मन्त्रालय अन्तर्गतबाट हुने कामहरूका लागी ओखलढुङ्गा जान पर्ने बाध्यताबाट जिल्लावासी मुक्त हुने जनाइएको छ ।

कार्यालयमा १२ जना कर्मचारी रहेर जिल्लावासीलाई सेवा दिनेगरी कार्यालय स्थापना हुन लागेको श्रोतले बताएको छ ।  मन्त्री राईले कोशी प्रदेशको मन्त्रीको रुपमा जिम्मेवारी सम्हालेपछि सोलुखुम्बु आउन लागेको यो पहिलो पटक हो ।  खोटाङ जिल्ला प्रदेश सभा ख बाट प्रदेश सांसदको रुपमा निर्वाचित हुनुभएका राईले हरेक जिल्लामा भौतिक पूर्वाधार विकास कार्यालय स्थापना गर्ने निर्णय गरेपछि जिल्लावासीले यसलाई सकारात्मक रुपमा लिएका छन् ।