हतुवागढीको प्रशासनिक भवन निर्माण अन्तिम चरणमा 

साउन १, सोलुखुम्बु । भोजपुर जिल्लाको हतुवागढी गाउँपालिकाको नयाँ प्रशासनिक भवन निर्माणको काम धमाधम चलिरहेको छ ।  गाउँपालिकाको प्रशासनिक २८ कोठे भवनको काम धमाधम भइरहेको हो । गाउँपालिकाको ४० प्रतिशत र सङ्घ सरकारको ६० प्रतिशत लागत साझेदारीमा  बन्ने भवनको निर्माण ९० प्रतिशत सम्पन्न भइसकेको गाउँपालिकाका प्रमुख प्रशासकीय अधिकृत महेश निरौलाले बताउनुभयो ।  

मूल्य अभिवृद्धि कर (भ्याट)सहित रु सात करोड ५० लाख ४४ हजार १ सय ३७ को लागतमा निर्माणाधीन भवनको काम अन्तिम चरणमा पुगेको छ । केन्द्र सरकारले हालसम्म साझेदारी रकमको रु दुई करोड ३७ मात्र प्राप्त भएको गाउँपालिका अध्यक्ष प्रेमकुमार राईले जानकारी दिनुभयो । गाउँपालिकाले रु पाँच करोड लगानी गरिसकेको छ । गाउँपालिका भवन निर्माणको लागि हालसम्म छ करोड ९० लाखको वित्तिय प्रगती भएको अधिकृत निरौलाले बताउनुभयो ।