लिम्चुङ्बुङ–५ मा किशोरीलाई महिनावारी स्वच्छता सम्बन्धी अभिमुखिकरण

साउन १, सोलुखुम्बु । उदयपुरको लिम्चुङ्बुङ गाउँपालिका वडा नम्बर ५, जाँतेमा बुधबार किशोरीहरूलाई लक्षित गरी महिनावारी स्वच्छता सम्बन्धी एकदिने अभिमुखिकरण कार्यक्रम सम्पन्न भएको छ । वल्र्ड भिजन इन्टरनेसनल नेपालको आर्थिक सहयोगमा, स्वास्थ्य चौकी जाँतेको समन्वय र जाल्पा एकीकृत विकास समाज उदयपुरको आयोजनामा उक्त कार्यक्रम सम्पन्न गरिएको हो । कार्यक्रम जाँतेस्थित वडा सभाहलमा आयोजना गरिएको थियो, जहाँ वडा भित्रका विभिन्न टोलहरूबाट ५५ जना किशोरीहरूको उल्लेखनीय उपस्थिति रहेको थियो ।

जाल्पा एकीकृत विकास समाजका सामाजिक परिचालक सन्तोष राईका अनुसार कार्यक्रममा महिनावारीको समयमा विद्यालय नियमित जाने, पोषिलो खानेकुराको सेवन गर्ने, व्यक्तिगत सरसफाइमा ध्यान दिने, तथा विभिन्न संक्रमणजन्य रोगहरूबाट बच्नका उपायहरूबारे जानकारी दिइएको थियो ।

किशोरीहरूलाई सेनेटरी प्याड प्रयोग गर्ने तरिका, आयरन फोलिक एसिडको सही प्रयोग, स्थानीय स्रोतसाधनबाट सजिलै बनाउने मिल्ने घरेलु सेनेटरी प्याड र त्यसको प्रयोग गर्दा अपनाउनु पर्ने सावधानीसम्बन्धी विषयमा समेत जानकारी गराइएको बालमैत्री स्थानीय शासन फोकल पर्सन मिलन परियारले जानकारी दिनुभयो ।

उक्त अभिमुखिकरण कार्यक्रमको सहजीकरण स्वास्थ्य चौकी जाँतेकी अनमी बबिता बुढाथोकी र अनु तामाङले गर्नुभएको थियो । कार्यक्रमले किशोरीहरूमा महिनावारी सम्बन्धी भ्रान्तिहरू हटाउन र व्यवहारिक ज्ञान विस्तार गर्न महत्वपूर्ण योगदान पु¥याएको आयोजकहरूले जनाएका छन् ।