ओखलढुंगामा मोटरसाइकलको ठक्करबाट घाइते भएकी बालिकालाई हेलिकप्टरमार्फत काठमाडौं पठाइयो

साउन १, सोलुखुम्बु । ओखलढुंगाको सिद्धिचरण नगरपालिका–११ मिलनचोकमा बुधबार साँझ मोटरसाइकलको ठक्करबाट गम्भीर रूपमा घाइते भएकी बालिकालाई थप उपचारका लागि काठमाडौंस्थित सिएमसी अस्पताल लगिएको छ । सोलुखुम्बु माप्यदुधकोशी गाउँपालिका–४ काँकु घर भई हाल मिलनचोकमा बस्दै आएका टकेराज राईकी ४ वर्षीया छोरी रियासा राईलाई बा ८३ प ८४८१ नम्बरको मोटरसाइकलले ठक्कर दिँदा गम्भीर चोट लागेको थियो ।

उनलाई दुर्घटनापछि तत्काल ओखलढुंगा सामुदायिक अस्पताल भर्ना गरिएको थियो । अस्पतालका अनुसार बालिकाको टाउको, कम्मर र घुँडामा चोट लागेको छ भने शरीरका अन्य भागमा मध्यम चोट लागेको छ । हाल उनकी अवस्था सामान्य रहेको अस्पतालले जनाएको छ । बालिकाको परिवारजनको आग्रहमा थप उपचारका लागि बिहीबार बिहान हेलिकप्टरमार्फत काठमाडौंस्थित सिएमसी अस्पताल लगिएको हो ।

दुर्घटनामा संलग्न मोटरसाइकल चालक चिसंखुगढी गाउँपालिका–७ निवासी २१ वर्षीय सबिन राईलाई प्रहरीले नियन्त्रणमा लिएको छ । जिल्ला प्रहरी कार्यालय ओखलढुंगाका प्रहरी निरीक्षक एवं सूचना अधिकारी विजय कार्कीका अनुसार मोटरसाइकल र चालक दुवैलाई नियन्त्रणमा लिई घटनाबारे थप अनुसन्धान भइरहेको छ ।