नेचासल्यानको बुधबारे बजार उद्घाटन

साउन १, सोलुखुम्बु । सोलुखुम्बु जिल्लाको नेचासल्यान गाउँपालिका वडा नम्बर २ सल्यानमा अवस्थित बुधबारे बजारको औपचारिक रूपमा उद्घाटन गरिएको छ । “सफा बजार, हाम्रो साझा जिम्मेवारी“ भन्ने नाराका साथ बिहीबार एक विशेष कार्यक्रमबीच बजारको उद्घाटन गरिएको हो । कार्यक्रममा गाउँपालिका अध्यक्ष धनजन राई प्रमुख अतिथि रहनुभएको थियो भने उपाध्यक्ष विना राई, वडा अध्यक्ष सिताराम काफ्ले लगायत अन्य जनप्रतिनिधि र स्थानीय बासिन्दाहरूको उल्लेखनीय उपस्थिति रहेको थियो ।

उद्घाटन समारोहमा बोल्दै अध्यक्ष राईले स्वच्छ र व्यवस्थित बजार सञ्चालनको आवश्यकता औंल्याउँदै स्थानीय उत्पादनको प्रवद्र्धन, रोजगारी सिर्जना र आर्थिक सशक्तिकरणका लागि बजारले महत्वपूर्ण भूमिका निर्वाह गर्ने विश्वास व्यक्त गर्नुभयो । यस्तै उपाध्यक्ष विना राईले स्थानीयस्तरमै व्यापारिक अवसर सृजनामा बजारले टेवा पुर्याउने बताउनुभयो ।

स्थानीय स्तरमै व्यापार र साना व्यवसायको प्रोत्साहन गर्ने उद्देश्यले स्थापना गरिएको बुधबारे बजार हरेक हप्ता बुधबार सञ्चालन गरिनेछ । बजारमा कृषिजन्य उत्पादन, घरेलु सामग्री, लत्ताकपडा, खाद्यान्न लगायतका दैनिक उपभोग्य वस्तुहरू बिक्री वितरण गरिने छ ।