सोलुदुधकुण्ड वडा नं. ४ द्वारा काठमाडौँमा एकीकृत सेवा शिविर संचालन हुने

साउन २, सोलुखुम्बु । सोलुखुम्बुको सोलुदुधकुण्ड नगरपालिका वडा नम्बर ४, फाप्लुले काठमाडौँमा अस्थायी रुपमा बसोबास गरिरहेका आफ्ना नगरबासीहरुलाई लक्षित गरी एकीकृत सेवा प्रवाह सम्बन्धी शिविर संचालन गर्ने भएको छ । नगरपालिकाको असार २९ गते बसेको नगरकार्यपालिकाको बैठकको निर्णयअनुसार उक्त शिविर साउन ११ गतेदेखि १३ गतेसम्म काठमाडौँको रामनगर पार्टी प्यालेसमा संचालन गरिने वडा अध्यक्ष युवास तामाङले जानकारी दिनुभयो ।

उहाँका अनुसार शिविरमा नगरबासीहरुले सामाजिक सुरक्षा भत्ता दर्ता तथा बायोमेट्रिक प्रमाणीकरण, जन्म, मृत्यु, विवाह, बसाईसराई तथा सम्बन्ध विच्छेद सम्बन्धी नागरिक पञ्जिकरण सेवा, राष्ट्रिय परिचयपत्र वितरण लगायत वडा कार्यालयबाट प्रदान गरिने सम्पूर्ण सेवा प्राप्त गर्न सक्नेछन् । वडा अध्यक्ष तामाङले यो शिविरले काठमाडौँमा रहेका नगरबासीहरुलाई आफ्नै स्थानमा सेवा उपलब्ध गराई सुविधा पुर्याउने विश्वास व्यक्त गर्नुभयो । वडा कार्यालयले सबै सेवाग्राहीलाई आवश्यक कागजातसहित तोकिएको मितिमा उपस्थित भइ सेवा लिन अनुरोध गरेको छ ।