जिल्ला आयुर्वेद स्वास्थ्य केन्द्र सोलुखुम्बुमा मन्त्री राईको अनुगमन

साउन २, सोलुखुम्बु । भौतिक पूर्वाधार विकास तथा स्वास्थ्य मन्त्री भूपेन्द्र राईले सोलुखुम्बुस्थित जिल्ला आयुर्वेद स्वास्थ्य केन्द्रको शुक्रबार अनुगमन गर्नुभएको छ। भौतिक पूर्वाधार विकास कार्यालयको उद्घाटन कार्यक्रममा सहभागी हुन सोलुखुम्बु जिल्लामा आउनुभएका मन्त्री राईले स्वास्थ्य केन्द्रको अवस्थाबारे जानकारी लिँदै आवश्यक सुधारका पहल गर्ने प्रतिबद्धता व्यक्त गर्नुभयो। अनुगमनका क्रममा मन्त्री राईले स्वास्थ्य केन्द्रको आफ्नै भवन नभएकाले यसै महिनादेखि नै डिपिआर तयार गरी भवन निर्माण कार्य अघि बढाइने जानकारी दिनुभयो।

उहाँले भौतिक पूर्वाधारको विकाससंगै जनस्वास्थ्य सेवामा सुधार ल्याउन सरकारले प्राथमिकताका साथ काम गरिरहेको उल्लेख गर्नुभयो। अनुगमनमा जिल्ला समन्वय समितिका प्रमुख कृष्ण प्रसाद निरौला, भौतिक पूर्वाधार राज्यमन्त्री तथा पूर्व सामाजिक विकास मन्त्री बुद्धि कुमार राजभण्डारी, जिल्ला आयुर्वेद स्वास्थ्य केन्द्र सोलुखुम्बुका प्रमुख अमिन्द्र कुमार पण्डित लगायत स्थानीय जनप्रतिनिधि र सरोकारवाला निकायका प्रतिनिधिहरूको उपस्थिति रहेको थियो। स्वास्थ्य केन्द्रको अवस्थाबारे विस्तृत अवलोकनपछि मन्त्री राईले आवश्यक बजेट सुनिश्चित गर्दै निर्माण कार्य छिटो सम्पन्न गरिने विश्वास दिलाउनुभएको छ।