खोटाङका मेयर भट्टराई बाँस सम्बन्धी नीतिगत मागसहित काठमाडौँ प्रस्थान, साउन ११ देखि भोक हड्तालको घोषणा

साउन ४, सोलुखुम्बु । खोटाङको दिक्तेल रूपाकोट मझुवागढी नगरपालिकाका नगर प्रमुख तीर्थराज भट्टराई बाँस र बाँसजन्य कच्चा पदार्थको प्रयोगलाई नीति तहमा स्थापित गराउन माग गर्दै काठमाडौंतर्फ प्रस्थान गर्नुभएको छ । उहाँले साउन ११ गतेदेखि राजधानीको माइतीघर मण्डलामा भोक हड्ताल गर्ने घोषणा गर्नुभएको छ । नगर प्रमुख भट्टराई आइतबार बाँस, बाँसबाट निर्मित विभिन्न सामाग्री, परालबाट बनाइएको गुन्द्री, राडी लगायतका परम्परागत सामग्रीसहित काठमाडौँतर्फ हिँड्नुभएको हो ।

उहाँले संघीय सरकारलाई बाँसको उपयोगमार्फत आर्थिक समृद्धिको बाटो खोल्नका लागि आवश्यक नीतिगत निर्णय लिन आग्रह गर्दै सत्याग्रहको घोषणा गर्नुभएको छ । जताततै पाइने बाँसलाई प्रयोग गरेर आर्थिक आम्दानी लिने वातावरण निर्माणका लागि सङ्घीय सरकारको ध्यानाकर्षणका लागि सत्याग्रहको घोषणा गरिएको उहाँको भनाइ छ ।

तीन दिनसम्मको भोक हड्तालबाट माग सम्बोधन नभए साउन १४ गतेदेखि आमरण अनशन बस्ने प्रमुख भट्टराईले बताउनुभएको छ । साउन ११ गते माइतीघर मण्डलामा भोक हड्ताल गर्ने नगर प्रमुख भट्टराईको तयारी छ । तीन दिनसम्म दैनिक बिहान ९ बजेदेखि साँझ ५ बजेसम्म भोक हड्तालमा बस्दा पनि माग सुनुवाइ नभए साउन १४ गते बिहान ९ बजेदेखि आमरण अनशन बस्ने उहाँको भनाइ छ । बाँसको महत्त्वलाई उजागर गर्नका लागि नगरपालिकाले गत २०८१ फागुन १५ गतेदेखि फागुन १७ गतेसम्म प्रथम राष्ट्रिय सम्मेलन गरेको थियो ।