काँगेल र जुवु जोड्ने निर्माणाधिन पुल बाढीले बगायो, नागरिकको आशा र करोडौँ लागनी दुधकोशीमा बग्यो

साउन ५, सोलुखुम्बु । सोलुखुम्बुको थुलुङ दुधकोशी गाउँपालिका वडा नम्बर २ काँगेल र वडा नम्बर ४ जुवुको सिमानामा निर्माणाधीन मोटरेवल पुल भत्किएको छ ।  निर्माणको चरणमा रहेको उक्त मोटरेवल पुल गत असार २५ गते र साउन ३ गते आएको वर्षात पछिको बाढीले पूर्णरुपमा क्षतीग्रस्त बनेको हो । करिव ७० प्रतिशत निर्माण सम्पन्न भइसकेको मोटरेवल पुल निर्माण सम्पन्न हुनुअगावै भत्कीएको हो ।

बाढीका कारण सोही गाउँपालिकाको नेले र काँगेल हुँदै बहने शिखु खोलामा भारी गेगर(ढुंगा) सहितको बाढी आएपछि उक्त बाढीले दुधकोशी करिव १० मिनेट थुनिएको थियो । पूर्ण रुपमा बन्द भएको दुधकोशी फुटेर  उक्त गेगर निर्माणाधीन पुल क्षेत्रमा गएर थुप्रिँदा पुल पूर्ण रुपमा काम नलाग्ने अवस्थामा पुगेको हो । खाम्पाचे निर्माण कम्पनीले १७ करोड ५० लाखको लागतमा २०७६ सालमा ठेक्का सम्झौता गरेको निर्माण कम्पनीले ७ वर्ष लगाएर बल्ल बल्ल करिव ७० प्रतिशत काम सम्पन्न गरेको थियो गत साउन ३२ गते आएको बाढीले सोही स्थानमा निर्माणाधीन पुलको पिलर बगाइदिएको थियो ।

सो पश्चात निर्माण कम्पनीले चाँडो काम सक्ने होडमा उचित स्थान र सहि ठिजाइन विना काम गर्दा यो अवस्था निम्ताएको स्थानीय टेक बहादुर बस्नेतले बताउनुभयो ।  पुल बाढीले बगाएपछि थुलुङ दुधकोशी गाउँपालिका वडा नम्बर ४, ५ र ९ का नागरिकले झिनो आसाको दियो निभेको महसुस गरेका छन् । उक्त मोटरेवल पुल बन्ने अनिश्चित भएपछि सो वडाका नागरिकहरूले फेरी एकपटक झोलुङ्गे पुलको प्रयोग गरि गाउँपालिकाको केन्द्र सहित जिल्ला सदरमुकाम धाउनुपर्ने बाध्यता परेको छ ।  जसको कारण वर्षायाममा सिधा सवारी साधन आवतजावतबाट नागरिक वञ्चित हुने सो गाउँपालिकाको वडा नम्बर २ काँगेलका अध्यक्ष युजन बस्नेतको भनाई छ ।