चिवाङ खोलामा बन्यो ट्रष्ट पुल, पर्यटक र स्थानीयलाई सहजहुने विश्वास 

साउन ६, सोलुखुम्बु ।  सोलुखुम्बुको सोलुदुधकुण्ड नगरपालिका  वडा नम्बर ४ स्थित चिवाङ खोलामा ट्रस्ट पुल निर्माण सम्पन्न भएको छ ।  कोशी प्रदेश र सोलुदुधकुण्ड नगरपालिकाको लागत साझेदारीमा निर्माण गरिएको पुलको निर्माण सम्पन्न भएको छ ।  उक्त पुलले वडाका नागरिकलाई वर्षायामको समयमा आवतजावत गर्न सहजता प्रदान गर्ने जनाइएको छ ।

 सोलुदुधकुण्ड नगरपालिकाको ४ लाख ६६ हजार ८ सय ९ रुपैयाँ र कोशी प्रदेश सकारको ७ लाख ६९ हजार ३ सय ४६ रुपैयाँ र जनश्रमदान मार्फत ७१ हजार ८ सय १६ रुपैयाँ गरि कुल १३ लाख ७ हजार ९ सय ७१ रुपैयाँको लागतमा निर्माण भएको उक्त पुलको  लम्बाइ ३२ मिटर रहेकाे वडा अध्यक्ष युवास तामाङले बताउनुभयो ।

फाप्लुबाट क्याम्जे हुदै चिवाङ गुम्बा जाने पदमार्गलाई जोडन उक्त ट्रष्ट पुल निर्माण गरिएको अध्यक्ष तामाङ को भनाई छ । यसले सो क्षेत्रमा पदमार्ग प्रयोग गरेर भ्रमण गर्ने पर्यटक र स्थानीयलाई निकै सहज हुने उहाँको विश्वास छ ।