सोलुखुम्बुमा सुरु भयो विद्युतीय ट्राफिक जरिवाना प्रणाली, नागरीक एपबाटै सबैकाम हुने

साउन ७, सोलुखुम्बु ।  हिमाली जिल्ला सोलुखुम्बुमा ट्राफिक नियम उल्लङ्घनको जरिवाना अव विद्युतीय माध्यमबाट तिर्न र काट्न सकिने भएको छ ।  जिल्ला ट्राफिक प्रहरी कार्यालय सोलुखुम्बुले गत साउन १ गतेदेखि लागू हुने गरि सवारीचालक कारवाही र फाइनको भुक्तानी अनलाईन माध्यमबाटै हुने व्यवस्था मिलाएको हो । अब ट्राफिक नियम उल्लंघन गर्ने चालकले कारवाहीमा परेपछि आफ्ना सवारी कागजात पुनः लिनको लागि ट्राफिक कार्यालय धाउनु पर्ने झन्झटबाट मुक्त हुने ट्राफिक प्रहरी कार्यालय सोलुखुम्बुका प्रमुख, प्रहरी सहायक हवल्दार चन्द्र बहादुर बस्नेतले  बताउनुभयो ।

अव प्रहरीले चेकिङको क्रममा कैफीयत भेटीएका चालकको कागजात जफत नगरी क्यूआर कोड मार्फत सवारी चालक अनुमतिपत्र (लाइसेन्स) स्क्यान गरेर ई–चलान काट्नेछ । सो पश्चात नागरिक एप्स भित्र गएर लाइसेन्समा रहेको क्यिूआर कोड स्क्यान गरेपछि ट्राफिक कारवाही जरिवाना चिट (चलान) को नम्बर सोझै चालकको मोबाइलमा प्राप्त हुने कार्यालयका प्रहरी सहायक हवल्दार चन्द्र बहादुर बस्नेतले बताउनुभयो ।

सो नम्बर प्रयोग गरी चालकले ई–सेवा वा खल्ती जस्ता डिजिटल माध्यमबाट सजिलै जरिवाना तिर्न सक्नेछन्। ट्राफिक कार्यालयका अनुसार यस प्रणालीले नागरिकको समयको बचत हुनुका साथै प्रशासनिक प्रक्रियालाई डिजिटल, छरितो र पारदर्शी बनाउने अपेक्षा गरिएको छ ।