साउन ९, सोलुखुम्बु । नेचासल्यान गाउँपालिकाले काठमाण्डौमा सेवा शिविरको आयोजना गर्ने भएको छ । गाउँपालिकामा स्थायी बसोबास रहि काठमाण्डौमा बस्दै आएका गाउँपालिकाका नागरिकको सेवाका लागी काठमाण्डौमै सेवा शिविरको आयोजना गर्न लागिएको हो ।
आगामी १९ गते देखी २१ गते सम्म गाउँपालिकाले नवदुर्गा पार्टी प्यालेस सुकेधारामा सेवा शिविर आयोजना गर्न लागेको गाउँपालिका अध्यक्ष धनजन राईले बताउनुभयो । नेचासल्यान गाउँपालिका स्थायी ठेगाना भई हाल काठमाडौंमा अध्ययन, रोजगारी लगायतका कारणले बसोबास गर्दै आएका नागरिकहरूलाई वडा कार्यालयबाट प्रदान गरिने सेवा सुविधा प्रदान गर्न लागिएको निमित्त प्रमुख प्रशासकीय अधिकृत केशव वास्तोलाले बताउनुभयो ।
उक्त शिविर मार्फत गाउँपालिकाले सामाजिक सुरक्षा भत्ता दर्ता तथा नवीकरण, मालपोत तथा भूमि कर सङ्कलन, पञ्जिकरण सम्बन्धी (जन्म, मृत्यु, विवाह, बसाइँसराई, सम्बन्धविच्छेद, राष्ट्रिय परिचयपत्र वितरण, ज्येष्ठ नागरिक परिचय पत्र र वडा कार्यालयबाट प्रदान हुने गरिने सिफारिसहरू लगायतका सेवा प्रदान गरिने बताइएको छ ।
Discussion about this post