साउन १३, सोलुखुम्बु । साल्ट ट्रेडिङ कर्पोरेशन लिमिटेडको डिपो कार्यालय, सोलुखुम्बुले आर्थिक वर्ष २०८१/८२ मा ६८ लाख रुपैयाँभन्दा बढीको नुन बिक्री गरेको छ । सदरमुकाम सल्लेरीबाट मात्रै ५० लाख २८ हजार ७५० रुपैयाँ बराबरको ५ हजार ५ सय ८७.५० क्विन्टल नुन बिक्री गरिएको कार्यालय प्रमुख श्याम प्रसाद शाहले बताउनुभयो । त्यसैगरी, कोशी पारीको क्षेत्रका लागि सहकारीमार्फत सोताङबाट १८ लाख रुपैयाँ बराबरको २ हजार क्विन्टल नुन बिक्री भएको उहाँको भनाई छ ।
कार्यालयसँग उक्त वर्षमा कुल ६ हजार १ सय ७१.५० क्विन्टल नुन रहेकोमा हालसम्म ५ हजार ५ सय ८७.५० क्विन्टल बिक्री भइसकेको र हाल ५८४ क्विन्टल नुन स्टकमा रहेको कार्यालयले जनाएको छ । डिपो कार्यालयले ९ रुपैयाँ प्रति केजीको दरमा नुन बिक्री गर्दै आएको छ । कार्यालयले दसैँ, तिहार र छठपर्वलाई लक्षित गरी सहुलियत दरमा सुपथ मूल्य पसलमार्फत नुन बिक्री गर्दै आएको समेत जनाइएको छ ।
Discussion about this post