सगरमाथाबाट आरोहीका शव र फोहोर तत्काल सफा गर्न सांसद शेर्पाको माग

साउन १३, सोलुखुम्बु । सोलुखुम्बु क्षेत्र (क) का प्रदेश सांसद गोम्बु शेर्पाले विश्वको सार्वोच्च शिखर सगरमाथामा वर्षौदेखि थुप्रिएको फोहोर र अलपत्र शव तत्काल सरसफाइमा पहल गर्न प्रदेश सरकारसमक्ष माग राख्नुभएको छ । सोमबार कोशी प्रदेश सभाको बैठकको शून्य समयमा बोल्दै सांसद शेर्पाले फोहोर र आरोहीहरूको शव व्यवस्थापन नहुँदा नेपालकै शाख गिर्न थालेको भन्दै उहाँले यस्तो माग गर्नुभएको हो ।

सांसद शेर्पाले कोशी प्रदेश सभाबाट सगरमाथामा यत्रतत्र थुप्रिएको फोहार र आरोहीहरूको अलपत्र शव व्यवस्थापन गर्न संघीय सरकारसँग पहल गर्न प्रदेश सरकार गुहार्नुभएको छ । यस्तै उहाँले सगरमाथामा वर्षौँदेखिको २० हजार केजीभन्दा बढी फोहोर थुप्रिएको र हिमाल आरोहण गर्दा मृत्यु भएका आरोहीहरूको शव टेक्नुपर्ने बाध्यता रहेको बताउनुभयो ।