सोलुखुम्बुमा एक आर्थिक वर्षमा २ हजारभन्दा बढी सचेतनामूलक कार्यक्रम संचालन

साउन १३, सोलुखुम्बु । जिल्ला प्रहरी कार्यालय सोलुखुम्बुले आर्थिक वर्ष २०८१/०८२ मा समुदाय प्रहरी साझेदारी कार्यक्रम अन्तर्गत २ हजार १११ वटा सचेतनामूलक कार्यक्रम सञ्चालन गरेको छ । समाजमा शान्ति, सुरक्षा तथा अमन चयन कायम राख्ने उद्देश्यले जिल्लाका शहरी क्षेत्रदेखि दुर्गम गाउँसम्म निरन्तर रुपमा गस्ती, सूचना संकलन, शंकास्पद गतिविधिमा निगरानी तथा आपराधिक घटनामा तत्काल कारबाही गर्दै नागरिकमैत्री प्रहरी सेवा प्रदान गरिएको प्रहरीले जनाएको छ ।

कार्यक्रम अन्तर्गत प्रहरी र आम नागरिकबीचको सम्बन्धलाई बलियो बनाउँदै महिला हिंसा, लागू औषध दुव्र्यसन, ट्राफिक नियम, साइबर अपराध, आत्महत्या न्यूनीकरण, मानव बेचबिखन, घरेलु हिंसा, जातीय विभेद, बालविवाह, बालअधिकार हनन, प्राकृतिक प्रकोप जस्ता विविध विषयमा जनचेतना अभिवृद्धि गराउँदै कानुनी जानकारी समेत प्रदान गरिएको जिल्ला प्रहरी कार्यालय सोलुखुम्बुले जनाएको छ ।

यसै कार्यक्रममार्फत स्थानीय पालिकाहरू, विद्यालयहरू तथा विभिन्न संघ–संस्थासँगको सहकार्यमा कार्यक्रमहरू सञ्चालन गरिएका हुन् । कोशी प्रदेशभर २ लाख ३८ हजारभन्दा बढी सर्वसाधारण लाभान्वित भएका छन्। जिल्लागत तथ्याङ्कअनुसार खोटाङले सबैभन्दा बढी ४ हजार १५५ कार्यक्रम सञ्चालन गरेको छ। त्यसपछि इलामले ३ हजार ५७९, सुनसरीले २ हजार १३५, भोजपुरले १ हजार ९१७, झापाले १ हजार ५९८, धनकुटाले १ हजार २६०, ओखलढुंगाले १ हजार १०७, उदयपुरले ८२४, संखुवासभाले ७७२, ताप्लेजुङले ७३६, मोरङले ७०५, तेह्रथुमले ६०६ र पाँचथरले ६०१ कार्यक्रम सम्पन्न गरेका छन् ।

कोशी प्रदेश प्रहरी कार्यालयका अनुसार यी कार्यक्रमहरूले ग्रामीण तथा दुर्गम क्षेत्रका नागरिकमा सुरक्षा चेतना र कानूनी ज्ञान अभिवृद्धि गर्दै अपराधमुक्त समाज निर्माणमा उल्लेखनीय योगदान पुर्याएको छ ।