सोलुदुधकुण्ड नगरपालिकाले एकीकृत सेवा शिविरको मिति थप गर्यो

साउन १३, सोलुखुम्बु । सोलुखुम्बुको सोलुदुधकुण्ड नगरपालिकाले काठमाडौँमा सञ्चालन गरिरहेको एकीकृत सेवा शिविरको मिति थप गरिएको छ । नगरपालिकाका मेयर नाम्गेल जाङ्बु शेर्पाका अनुसार, साउन ११ गतेदेखि सुरु भएको शिविरको पूर्वनिर्धारित समय अपुग भएकोले साउन १४ गतेसम्म सेवा सञ्चालन गरिने निर्णय गरिएको हो । प्रमुख प्रशासकीय अधिकृत टुक्ति शेर्पाका अनुसार, शिविर काठमाडौँको रामहिटीस्थित रामनगर पार्टी प्यालेसमा सञ्चालन भइरहेको छ ।

नगरपालिकाका ११ वटा वडामा स्थायी रूपमा बसोबास गर्ने तर हाल काठमाडौँमा बसोबास गरिरहेका नगरबासीको सहजतालाई मध्यनजर गर्दै सेवा काठमाडौँमै प्रदान गरिएको हो । शिविरमा राष्ट्रिय परिचयपत्र वितरण, सामाजिक सुरक्षा भत्ता नवीकरण, मालपोत तथा भुमिकर, सम्बन्धी सेवा,जन्म, मृत्यु, नाता प्रमाणिकरण, बसाइँसराइ तथा अन्य पञ्जीकरणसम्बन्धी सेवा प्रदान गरिरहेको नगरपालिकाले जनाएको छ ।