जाल्पा एकीकृत विकास समाज र वर्ल्ड भिजन नेपालद्वारा अपाङ्गता भएका बालबालिकालाई सहयोग

साउन १३, सोलुखुम्बु । जाल्पा एकीकृत विकास समाज, उदयपुर र वर्ल्ड भिजन नेपालको सहकार्यमा रौतामाई गाउँपालिका–६ स्थित अपाङ्गता भएका बालबालिकाहरूलाई आवश्यक सहायक सामग्री वितरण गरिएको छ । मंगलबार गाउँपालिका–६ को कार्यालय परिसरमा आयोजित कार्यक्रममा ६ जना अपाङ्गता भएका बालबालिकाहरूलाई करिब ८५ हजार रुपैयाँ बराबरका ह्वीलचेयर, कमोड कुर्सी, विशेष प्रकारका जुत्ता, इयरफन लगायतका सामग्रीहरू प्रदान गरिएको हो ।

कार्यक्रममा जाल्पा एकीकृत विकास समाजका अध्यक्ष पुस्पराज पोखरेलले वितरण गरिएका सामग्रीहरू बालबालिकाको दैनिकी जीवन सहज बनाउन मदत पुग्ने विश्वास व्यक्त गर्नुभयो । उक्त कार्यक्रम रौतामाई गाउँपालिका र जाल्पा एकीकृत विकास समाजको संयुक्त समन्वयमा सम्पन्न भएको हो । वल्र्ड भिजन ईन्टरनेसनल नेपालका जिल्ला संयोजक आनन्द खड्काले कार्यक्रममा बोल्दै बालमैत्री समाज निर्माणका लागि यस्ता कार्यक्रमहरूलाई स्थानीय तहबाट समेत निरन्तरता दिनुपर्ने आवश्यकता औंल्याउनु भयो ।

उहाँले संस्थाले विगतदेखि नै बाल संरक्षणको क्षेत्रमा काम गर्दै आएको उल्लेख गर्दै यस्ता सहकार्यले अपाङ्गता भएका बालबालिकाको जीवनमा सहजता ल्याउनुका साथै उनीहरूलाई आत्मनिर्भर बनाउन सहयोग पुग्ने विश्वास व्यक्त गर्नुभयो । कार्यक्रममा वडा नं–६ का अध्यक्ष पृथ्वी कुमार राई, परियोजना संयोजक जंग बहादुर धिमाल, रुद्र प्रसाद पोखरेल, वल्र्ड भिजन नेपालका जिल्ला संयोजक आनन्द खड्का, साथै विभिन्न सामाजिक संघसंस्थाका प्रतिनिधि तथा स्थानीय बासिन्दाहरूको उल्लेखनीय उपस्थिति रहेको बालमैत्री स्थानीय शासन फोकल पर्सन मिलन परियारले जानकारी दिनुभयो ।