सोलुखुम्बुमा सौतेनी बाबुको खुकुरी प्रहारबाट २२ वर्षीय युवक घाइते

साउन १३,सोलुखुम्बु । सोलुखुम्बुको सोलुदुधकुण्ड नगरपालिका–५ सिदार्थ टोलमा एक युवक आफ्नै सौतेनी बाबुको खुकुरी प्रहारबाट घाइते भएका छन् । घाइते हुनेमा २२ वर्षीय पासाङ राई रहेका छन् । घटना साउन १२ गते सोमबार अपराह्न ४ः४५ बजे भएको हो ।

 प्रहरीले जनाएअनुसार राईलाई उनका ३७ वर्षीय सौतेनी बाबु फुर्बा शेर्पाले खुकुरी प्रहार गरेका हुन् । मादक पदार्थ सेवन गरि छोराको घरमा आएका शेर्पाले राईलाई खुकुरी प्रहार गरेका थिए । खुकुरी प्रहारबाट राईको बाँया पाखुरामा गहिरो चोट लाग्दा १६ टाँका लगाउनुपरेको जिल्ला प्रहरी कार्यालय सोलुखुम्बुले जनाएको छ ।

प्रारम्भिक अनुसन्धान अनुसार घरायसी विवाद र आर्थिक लेनदेनका कारण झगडा भई उक्त घटना भएको स्थानीयले बताएका छन् । प्रहरीले घटनामा संलग्न फुर्बा शेर्पालाई नियन्त्रणमा लिई ज्यान मार्ने उद्योग अन्तर्गत मुद्दा दायर गरेको जनाएको छ । घटनाबारे थप अनुसन्धान भइरहेको प्रहरीले जानकारी दिएको छ ।