नगरप्रमुख तीर्थराज भट्टराईको आमरण अनशन सुरु : नीतिगत व्यवस्थापनको माग

साउन १३, सोलुखुम्बु । खोटाङको दिक्तेल रुपाकोट मझुवागढी नगरपालिकाका नगरप्रमुख तीर्थराज भट्टराईले तीन दिनको भोक हड्तालपछि साउन १४ गते बुधबार बिहान ९ बजेदेखि माइतीघर मण्डलामा अनिश्चितकालीन आमरण अनशन सुरु गर्नुभएको छ । उहाँले राज्यको बेवास्ताप्रति गहिरो असन्तुष्टि जनाउँदै “माग पूरा नभएसम्म अनशन नतोड्ने“ अडान राख्नुभएको छ ।

प्रमुख भट्टराईका प्रमुख मागहरूमा बाँदरलगायतका जङ्गली जनावरको नीतिगत व्यवस्थापन, सरकारी निकायमा बाँस तथा कच्चा सामग्री प्रयोगका लागि आवश्यक बिल्डिङ कोर्ड र नम्स तयार गरी कानुन निर्माण, क्रसर उद्योगजस्ता प्रकृतिको दोहन गर्ने इकाईहरूविरुद्ध कडाभन्दा कडा कानुनी कारबाही, प्लास्टिकजन्य प्रदूषण फैलाउने उद्योगीहरूबाट स्थानीय तहलाई अतिरिक्त १० प्रतिशत कर उठाउने कानुनी प्रावधानको माग रहेका छन् ।

त्यस्तै, खोटाङ पुग्ने सडक तथा पुलको निर्माणमा लापरवाही गर्ने ठेकेदारहरूलाई कारबाही गरी काम सम्पन्न गराउनुपर्ने माग पनि प्रमुख भट्टराईले राख्नुभएको छ । उहाँले साउन ११ गतेदेखि १४ गतेसम्म बिहान ९ बजेदेखि साँझ ५ बजेसम्म माइतीघर मण्डलामा तीनदिने भोक हड्ताल गर्नुभएको थियो ।

कपाल मुण्डन गरी, बाँस, मान्द्रो, गुन्द्री, राडीजस्ता परम्परागत सामग्रीसहित सत्याग्रहमा उत्रनुभएका भट्टराईले “सरकारले सुन्दासम्म नहट्ने” दृढता व्यक्त गर्नुभएको छ । वार्ताका लागि नगरपालिकाका उपप्रमुख विसन राईको संयोजकत्वमा समिति गठन गरिएको भए तापनि अहिलेसम्म सरकारी पक्षबाट ठोस संवाद नभएको बताइएको छ ।