वाईसियल नेपालको श्रम तथा उत्पादन अभियान अन्तर्गत देउसामा श्रमदान

साउन १४, सोलुखुम्बु । वाईसियल नेपालले सुरु गरेको दुई महिनाको ‘श्रम तथा उत्पादन’ अभियान अन्तर्गत सोलुखुम्बुको थुलुङ दुधकोशी गाउँपालिका–८, देउसामा श्रमदान कार्यक्रम सम्पन्न भएको छ । बुधबार सम्पन्न उक्त कार्यक्रममा स्थानीय युवाहरूको सक्रिय सहभागितामा दुधकौशी माध्यमिक विद्यालयतर्फ जाने बाटोमा सिडी निर्माण गरिएको हो ।

श्रमदान कार्यक्रम वाईसियल नेपाल जिल्ला समिति र थुलुङ दुधकोशी–८ वडा समितिको संयुक्त समन्वयमा सम्पन्न गरिएको हो । अभियानमा सहभागी भएर युवाहरूले सामूहिक श्रमद्वारा समुदायमा योगदान पुर्याएका छन् । कार्यक्रममा वाईसियल नेपालका केन्द्रीय सदस्य शुजन राई, प्रदेश सदस्य कुल बहादुर राई, जिल्ला अध्यक्ष विवेक राई, उपाध्यक्ष अनिल राई, तथा अखिल (क्रान्तिकारी) का जिल्ला अध्यक्ष सोनाम शेर्पा लगायत स्थानीय अगुवा तथा युवाहरूको उपस्थिति रहेको थियो ।

वाईसियल नेपालले ‘श्रम तथा उत्पादन’ अभियानलाई आगामी दिनमा पालिका–स्तरमै विस्तार गर्दै अझ प्रभावकारी रूपमा अगाडि बढाउने योजना बनाएको छ । संगठनका अनुसार युवाहरूलाई श्रमको महत्वबारे जागरूक गराउँदै सामाजिक सेवा र उत्पादनशील कार्यमा संलग्न गराउनु अभियानको उदेश्य रहेको जनाइएकोे छ ।