स्वास्थ्य गम्भीर भए पनि नगरप्रमुख भट्टराईको सत्याग्रह स्थगित भएन

साउन १६, सोलुखुम्बु । खोटाङको दिक्तेल रुपाकोट मझुवागढी नगरपालिकाका नगर प्रमुख तीर्थराज भट्टराईले स्वास्थ्य अवस्था गम्भीर बन्दै गएको अवस्थामा पनि सत्याग्रह स्थगित गरेका छैनन्। वीर अस्पतालमा दुई दिनको उपचारपछि उनी पुनः माइतीघर मण्डलामा अनसनमा फर्किएका छन्।

साउन १४ गतेदेखि सात बुँदे मागसहित आमरण अनशनमा बसेका भट्टराईलाई रक्तचाप र चिनीको मात्रा अत्यधिक घट्ने, रिँगटा लाग्ने जस्ता स्वास्थ्य समस्या देखिएपछि अनशनस्थलबाट वीर अस्पताल लगिएको थियो। चिकित्सकले उनको स्वास्थ्य स्थिति गम्भीर बन्दै गएको भन्दै डिस्चार्ज दिन नमानेका थिए। तर भट्टराईले स्वास्थ्यको सम्पूर्ण जिम्मेवारी आफैं लिने भन्दै हस्ताक्षर गरी अस्पतालबाट फर्किएका हुन्।

भट्टराईले उठाएका सात बुँदे मागमा जलवायु परिवर्तनको असरबाट बच्न ठोस कानुनी व्यवस्था गर्नुपर्ने, सरकारी भवन तथा कार्यालयमा बाँस र अन्य कच्चा पदार्थ प्रयोग गर्न विल्डिङ कोड तथा मानक तय गरी कार्यान्वयन गर्नुपर्ने, र प्लास्टिकजन्य प्रदूषण गर्ने उद्योगीहरूबाट स्थानीय तहले अतिरिक्त कर लिन पाउने व्यवस्था गर्नुपर्ने उल्लेख छ।

देशको प्रकृति, संस्कृति र साधारण जनताको हितका लागि सत्याग्रह र आमरण अनशनमा बसेको दाबी गर्दै उनले माग पूरा नभए देहत्याग गर्ने सङ्कल्प लिएका छन्। भट्टराईका मागप्रति विभिन्न संघसंस्थाले ऐक्यबद्धता जनाएका छन्।