सगरमाथा क्षेत्रका बिरामीका लागि खुम्बु पासाङल्हामु गाउँपालिकाको हवाई उद्धारमा ३६ लाख बढी खर्च

साउन १६, सोलुखुम्बु । सोलुखुम्बुको खुम्बु पासाङल्हामु गाउँपालिकाले आर्थिक वर्ष २०८०÷८१ मा गम्भीर अवस्थामा परेका बिरामीहरूको हवाई उद्धारमा ३६ लाख ७४ हजार ४८० रुपैयाँ खर्च गरेको छ । गाउँपालिकाले शुक्रबार सार्वजनिक गरेको विवरणअनुसार कुल २५ जना बिरामीलाई आपत्कालीन अवस्थामा हेलिकप्टरमार्फत उद्धार गरिएको हो ।

गाउँपालिकाको स्वास्थ्य शाखा प्रमुख अर्थिमाया तामाङका अनुसार ती बिरामीलाई काठमाडौँ, लुक्ला र फाप्लुजस्ता स्थानमा रहेका अस्पतालसम्म पुर्याइएको थियो । भौगोलिक विकटताका कारण खुम्बु क्षेत्रमा सडक यातायातको पहुँच अत्यन्तै सीमित छ । यस्तो अवस्थामा गम्भीर बिरामी तथा आकस्मिक चिकित्सकीय आवश्यकताका लागि हेलिकप्टर उद्धार नै एक मात्र विकल्प बन्ने गरेको गाउँपालिकाले जनाएको छ ।

उद्धार कार्यका लागि विभिन्न हेलिकप्टर कम्पनीहरूमा स्नो आइस ट्राभल एन्ड टुर्स, अल्टिच्युड एयर, एभरेष्ट हेली, कैलाश हेलिकप्टर, तारा एयर, एयर डाइनेस्टी, मनाङ एयर र माउन्टेन हेलिकप्टर्सले उडान सञ्चालन गरेका थिए । गाउँपालिकाले आगामी वर्षमा अझ प्रभावकारी उद्धार र स्वास्थ्य सेवा सुनिश्चित गर्नका लागि बजेट तथा योजनामा प्राथमिकता दिने जनाएको छ ।